Ի՞նչ է Կրեմլն առաջարկել Ուկրաինային պատերազմը դադարեցնելու համար. The Wall Street Journal

Ռուսաստանի նախագահ Վլադիմիր Պուտինը հրապարակավ ակնարկել է, որ պատրաստ է քննարկել Ուկրաինայում պատերազմի ավարտը Մոսկվայի պայմաններով: Նրա ուզած գործարքի ուրվագծերը կարելի է տեսնել 2022 թվականի ապրիլին Ռուսաստանի և Ուկրաինայի պատվիրակությունների կողմից կազմված խաղաղ պայմանագրի նախագծում։

Այս մասին գրում է The Wall Street Journal-ը։

Փաստաթուղթը, որը թվագրված է 2022 թվականի ապրիլի 15-ին, նկարագրում է, թե ինչպես էին երկու կողմերի բանակցողները փորձում դադարեցնել մարտերը՝ համաձայնելով Ուկրաինան վերածել մշտապես չեզոք պետության, որը չի մասնակցում ռազմական բլոկներին, արգելելով նրան վերակառուցել իր բանակն Արևմուտքի աջակցությամբ:

Համաձայնագրի նախագծում ասվում էր, որ Ուկրաինային, չնայած ԵՄ-ին անդամակցելու հնարավորությանը, թույլ չի տրվի միանալ այնպիսի ռազմական դաշինքների, ինչպիսին ՆԱՏՕ-ն է։ Ուկրաինական հողում օտարերկրյա զենք չի թույլատրվի: Ուկրաինայի զինված ուժերը որոշակի չափերի կկրճատվեն: Ռուսաստանը ձգտել է սահմանափակել ամեն ինչ՝ սկսած զորքերի և տանկերի քանակից մինչև ուկրաինական հրթիռների կրակման առավելագույն շառավիղը։

Ղրիմի թերակղզին կմնա Մոսկվայի ազդեցության տակ և չեզոք չի համարվի։ Մոսկվան նաև պնդել է, որ ռուսաց լեզուն կառավարությունում և դատարաններում պետք է գործի ուկրաիներենի հետ հավասար հիմունքներով, ինչին, ըստ փաստաթղթի նախագծի, Կիևը չի աջակցել։

2014 թվականին Ռուսաստանի կողմից գրաված Արևելյան Ուկրաինայի ապագան չի ներառվել նախագծում՝ այն թողնելով Պուտինի և Զելենսկիի հայեցողությանը՝ անձնական բանակցությունների ժամանակ։

Ուկրաինայի հետ համաձայնագրի նախագիծը նախատեսում էր օտարերկրյա սպառազինությունների, այդ թվում՝ ցանկացած տեսակի հրթիռային զենքի, զինված ուժերի և կազմավորումների արգելք։ Մոսկվան ցանկանում էր, որ Ուկրաինայի զինված ուժերը կազմեն 85 հազար զինվոր, 342 տանկ և 519 հրանոթ։ Ուկրաինացի բանակցողները ցանկանում էին 250 հազար զինվորական, 800 տանկ և 1900 հրետանի, ասվում է փաստաթղթում։