Նախագահական դիմելուց հետո ոչինչ չփոխվեց, «Գազպրոմ»-ը փորձեց ջրից չոր դուրս գալ. Արտակ Պետրոսյան

«Գազպրոմ Արմենիա»-ի կողմից տուժած Արարատի մարզի Այինթափ համայնքից Պետրոսյանների ընտանիքի անդամները դեռ դատական քաշքշուկների մեջ են: Արտակ Պետրոսյանը newspress.am-ի հետ զրույցում ասաց, որ նախագահական դիմելուց հետո էլ դատական գործընթացն առաջ չի շարժվում, «Գազպրոմ Արմենիա»-ն էլ վնասի փոխհատուցման մասին չի մտածում:

«Մեզ նախագահականից պատասխան եկավ, որ մեր դիմումը հասցեագրվել է «Գազպրոմ Արմենիա»-ին, վերջինս էլ գիտեք, 2013 թ-ից «Գազպրոմ Արմենիա»-ն չի ուզում իր մեղքն ամբողջությամբ ընդունել և վնասի իրական փոխահատուցում տալ»,- մանրամասնեց նա:

Արտակ Պետրոսյանը նաև հիշեցրեց, որ 2013թ-ի մայիսին իրենց տան հարևանությամբ անցնող պոլիէթիլենից պատրաստված գազատար խողովակը պատռվել էր, ինչի հետևանքով գազը նրանց տուն էր լցվել: Մեկ տարի քննությունից հետո գործը մտել է դատարան: Արդեն շուրջ երկու տարի դատական գործընթացը շարունակվում է. փետերվարի ութին դատական նիստ կար, որը հետաձգվեց: Դատախազի հորեղբայրն էր մահացել, նույն դատախազի պատճառով անընդհատ դատական նիստերը հետաձգվում են:

«Պատճառը պարզ է` ժամանակ են շահում, որպեսզի «Գազպրոմը» հնարավորություն ունենա ջրից չոր դուրս գալ, հիմա էլ ասում են` շինարարական կազմակերպությունն է մեղավոր, բայց «Գազպրոմը» նրա կատարած աշխատանքը ընդունել է, լավ գնահատական է տվել, պատասխանատուն էլ ինքն էր, եթե խնդիր էր տեսնում, թող չընդուներ»,- շեշտեց Արտակ Պետրոսյանը:

Նա նաև մանրամասնեց , որ կրկնակի փորձաքննություն է կատարվել, որով «Գազպրոմ»-ի մեղքը ապացուցվում է, սակայն այս ամենից հետո էլ փորձում է գործի ընթացքն ի օգուտ իրեն լուծել:

Արտակ Պետրոսյանը տեղեկացրեց, որ վաղը կրկին ընտանիքով նախագահականի դիմաց են լինելու՝ հարկ եղած դեպքում, մի քանի օր շարունակ ակցիա կիրականացնեն:

Հիշեցնենք, որ հունվարի 28-ին ևս Պետրոսյանների ընտանիքը նախագահականի դիմաց ակցիա է իրականացրել: