Իշխանությունը փոփոխություն կանի միայն արտաքին ճնշման պարագայում. Արմեն Մարտիրոսյան

ԲՀԿ խմբակցության պատգամավոր Վահան Բաբայանը դրական է վերաբերում՝ Ընտրական օրենսգրքի փոփոխության միասնական պահանջների պլատֆորմ ստեղծելու ԱԺ ՀԱԿ խմբակցության ղեկավար Լևոն Զուրաբյանի առաջարկին։ Նրա խոսքով ՝ ԲՀԿ-ում պաշտոնապես առաջարկը չի քննարկվել, բայց պարզ է, որ ընտրական օրենսգրքի շուրջ միասնական առաջարկներ ներկայացնելը երկրի շահերից է բխում. 

«Մեզ մոտ գլխավոր խնդիրը ընտրական պրոցեսի նկատմամբ վստահության վերականգնումն է, ինչպես նաև ընտարկեղծիքների մասով ռիսկերը հնարավորինս կանխելը, նվազեցնելը»:

Վահան Բաբայանը նաև ընգծեց, որ ընտրական օրենսգիրքը երկրի ողնաշարն է լինելու. «Մենք բավական ակտիվ մասնակցելու ենք այդ գործընթացին, հենց փաստաթուղթը պատրաստ լինի` մեր պաշտոնական դիրքորոշումը կներկայցնենք»:

Վահան Բաբայանից հետաքրքրվեցինք ինչպես են ընտրական նոր օրենսգրքի հետ հույսեր կապում, եթե փոփոխողները իշխանության ներկայացուցիչներն են, որոնց մեղադրում են հենց ընտրակեղծիքներ կատարելու մեջ: Բաբայանն ասաց, որ պատի տակի խոսակցություններով չեն առաջնորդվում:

Newspress.am–ի հետ զրույցում Ժառանգություն կուսակցության փոխնախագահ Արմեն Մարտիրոսյանն էլ ասաց, որ Լևոն Զուրաբյանի հետ առաջարկի մասին խոսել են, միասնակությունը կարևոր է, բայց դեռ չի նշանակում, որ անգամ լավ ընտրական օրենսգիք ունենալու դեպքում ընտրակեղծիքները բացառվելու են, օրենսգրքի դրույթները կյանքի են կոչվելու. «մեր մոտեցումները մի փոքր տարբերվում են, մենք կարծում ենք, որ հաջողության կարող ենք հասնել միջազգային կազմակերպությունների, կառույցների հետ համագործակցությամբ, հաջողության կարելի է հասնել միայն արտաքին ճնշումների շնորհիվ»,- նշեց նա:

Արմեն Մարտիրոսյանը հիշեցրեց, որ հենց միջազգային աջակցությամբ է, որ իշխանությունները վերարտադրվել են և հիմա էլ կարողանում են երկրի տնտեսությունը ծանր, բայց կայուն վիճակում պահել, հակառակ պարագայում տնտեսությունը «կմահանար»: Ուստի հենց միջազգային ճնշումների շնորհիվ է, որ կարող են որևէ բան փոխել. «Բայց կրկին երաշխիքներ չկան, որ ընտրական օրենսգրքի դրույթները կյանքի կկոչվեն»:

Ըստ նրա՝ ոչ լեգիտիմ Սահմանադրությունից բխող Ընտրական օրենսգիրքը ունենալու է նույն ոչ լեգիտիմ բնույթը, եթե լուրջ ճնշումներ չլինեն: