Սպանություն Փոքր Մասրիկ գյուղի գերեզմանատան մոտ. ոստիկանությունը տեսանյութ է հրապարակել

Փետրվարի 21-ի ժամը 19.15-ին ՆԳՆ ոստիկանության օպերատիվ կառավարման կենտրոն «Վարդենիս» բժշկական կենտրոնից հաղորդում է ստացվել, որ բուժօգնության են տեղափոխվել դանակահարված երկու տղամարդ, որոնց առողջական վիճակը ծանր է:

Հիվանդանոց մեկնած օպերատիվ խումբը պարզել է, որ դանակահարվածները եղբայրներ են՝ Փոքր Մասրիկ գյուղի 40-ամյա և 36-ամյա բնակիչներ: Հիվանդանոցում 36-ամյա Արա Լալայանը մահացել է:

Ոստիկանության Վարդենիսի բաժնի ծառայողները ստացված տեղեկություններն իրացրին քրեական ոստիկանության գլխավոր և Գեղարքունիքի մարզային վարչությունների ու Մարտունու բաժնի ծառայողների հետ համատեղ։ Օպերատիվ-հետախուզական միջոցառումների արդյունքում պարզվեց, որ ժամը 18.30-ի սահմաններում Արփունք-Փոքր Մասրիկ գյուղամիջյան ճանապարհին՝ Փոքր Մասրիկի գերեզմանատան մոտ, կենցաղային հարցերի շուրջ վիճաբանություն և ծեծկռտուք է եղել Արփունք գյուղի բնակիչ 44-ամյա տղամարդու, նրա 19 և 15 տարեկան որդիների և Փոքր Մասրիկ գյուղի բնակիչ երեք եղբայրների միջև: Այդ ընթացքում էլ արփունքցի 19-ամյա երիտասարդը դանակով հարվածներ է հասցրել 40-ամյա և 36-ամյա տղամարդկանց:

Ձեռնարկված միջոցառումների արդյունքում ժամը 20.20-ին 19-ամյա երիտասարդը հայտնաբերվել, ձերբակալվել և տեղափոխվել է ոստիկանության Վարդենիսի բաժին, որտեղ խոստովանել է կատարածը:Նա ներկայացվել է վարույթն իրականացնող մարմին:

Վարդենիսի քննչական բաժին է ներկայացվել նաև 44-ամյա տղամարդը՝ 19-ամյա երիտասարդի հայրը։  Նա ներկայացրել է դեպքի վայրից վերցված հանցագործության գործիք ծալովի դանակը:

Կազմված փաստաթղթերն ուղարկվել են Վարդենիսի քննչական բաժին:

Սպանության և սպանության փորձի հատկանիշներով քրեական վարույթ է նախաձեռնվել:

19-ամյա երիտասարդը տեղափոխվել է ՆԳՆ ոստիկանության Վարդենիսի բաժնի ձերբակալվածների պահման վայր:

Կատարվում է նախաքննություն: