Հացի և ալյուրի թեման` սովորական աչքակապություն

Կառավարության հանձնարարականով՝ ՏՄՊՊՀ-ն ուսումնասիրություն է կատարել հացի շուկայի 10 խոշոր ընկերություններում: Այս հանձնարարականը կառավարությունը տվել էր՝ հաշվի առնելով ալյուրի գնի մոտ 30 տոկոս նվազումը այն դեպքում, երբ հացի գինը գրեթե անփոփոխ էր մնացել:

ՏՄՊՊՀ նախագահ Արտակ Շաբոյանը հայտնեց, որ 2015թ-ին հացի գինը նվազել է մոտ 10 տոկոսով, իսկ հացի գինը չի իջնում, քանի որ գազի և էլեկտրականության գները բարձրացել են:

Նշենք, որ վերջին շրջանում ալյուրի և հացի գների հետ կապված Արտակ Շաբոյանը հայտնվել է մեղմ ասած անհարմար վիճակում, նա չի կարողանում բարձրաձայն հայտարարել, որ իր կառույցը չի կարողանում կարգավորել մոնոպոլիզացված ալյուրի շուկան, իսկ հացի շուկան ընդհանրապես չի կարողանում վերահսկել: Շատ հաճախ ալյուրի և հացի արտադրությունները սերտ կապված են և տարանջատել, կամ կարգավորել առանձին-առանձին, գրեթե անհնար է:

Ալյուրի շուկայում մենաշնորհ է, Սամվել Ալեքսանյանն է ալյուրի խոշոր ներկրողը և մանր ներկրողների համար, հատկապես վերջին շրջանում, անհավանական է դարձել ալյուր ներկրել:

Newspress.am-ի տեղեկություններով` մաքսակետերում կարողանում են հանգիստ անցնել միայն նրա ալյուրով բեռնված մեքենաները: Իսկ այլ մանր ներկրողների ալյուրը անցնում է խիստ ստուգում, նաև հավելյալ գումարներ են պահանջում, որի դեպքում արդեն Հայաստանում իրացնելը դառնում է գրեթե ինքնարժեքով և ոչ ձեռնտու:

Կարո՞ղ է արդյոք Արտակ Շաբոյանը գործադիրի նիստում բարձրաձայնել այս ամենի մասին, իհարկե` ոչ: Եվ գործադիրում տեղյակ են իրավիճակին, և ՏՄՊՊՀ-ն է տեղեկացված, սակայն այս մասին ոչ ոք չի բարձրաձայնում, մնում է հացի և ալյուրի գնի վերաբերյալ կառավարության անհանգստությունը դարձնել աչքակապություն: