Դեպի Արցախ ճանապարհը կբացվի միայն այս իշխանության հեռացման դեպքում. Ասկերանի նախկին ղեկավար

Արցախի նախագահի ուղերձն այն էր, որ պետք է վերադարձ ապահովենք դեպի Արցախ: Այդ մասին ուղղակի զրույց չի եղել, իսկ ճանապարհները տարբեր են: Այս մասին այսօր ՀՀ-ում Արցախի ներկայացուցչության մոտ լրագրողների հետ զրույցւոմ ասաց Ասկերանի վարչակազմի նախկին ղեկավար, Արցախի խորհրդարանի երեք գումարման պատգամավոր Ալյոշա Գաբրիելյանը։

«Արցախի վերադարձը կապված է հայոց վերածննդի հետ, հայոց զարթոնքի հետ: Առանց հայության զարթոնքի հնարավոր չի լինելու վերադարձ Արցախ: Այդ զարթոնքը լինելու է այն դեպքում, երբ բոլորս միասին կանգնենք, այս իշխանություններին հեռացնենք, որից հետո ճանապարհ կբացվի դեպի Արցախ, որովհետև այս իշխանություններն ամեն ինչ անում են, որպեսզի Արցախ բառը չհնչի և ամեն ինչ անում են, որպեսզի մոռացության տան ոչ միայն Արցախը, այլև պատմական մեր հայրենիքը»,- ասաց նախկին պաշտոնյան: 

Լրագրողի հարցին, թե այսինքն` Արցախի ներկայացուցչությունում քննարկվել է Հայաստանի իշխանություններին հեռացնելու հա՞րցը, Ասկերանի նախկին ղեկավարը բացասական պատասխան տվեց և հավելեց, որ դա միայն իր տեսակետն է:

«Սխալ բաներ չխոսենքք: Այստեղ հիմնականում շնորհավորանքներ էին, հիշում էինք մեր անցած ուղին, այն սխալները, որ բաց ենք թողել և այն ճանապարհը, որ մենք տեսնում ենք Արցախը վերադարձնելու համար: Խոսքը գնում էր նաև Արցախի համայնքի պահպանության, մեր հոգևոր-մշակութային արժեքների պահպանության մասին: Այնպես չանենք, որպեսզի ցրվենք, ինչպես ցանկանում են իշխանությունները` ցրեն, տիրանան»,- նկատեց Գաբրիելյանը:

Նա նշեց, որ Արցախի լուծարման հրամանագրին չեն անդրադարձել` ընդգծելով, որ ինքը դրան ուշադրություն չի դարձնում, որովհետև ոչ մի անձ, որքան էլ պետական պաշտոն զբաղեցնի, չի կարող հանրաքվեով ժողովրդի կամրատահայտությանը դեմ գնալ: 

Ասկերանի նախկին ղեկավարը ևս մեկ անգամ շեշտեց, որ Արցախի նախագահ Սամվել Շահրամանյանը Հայաստանի իշխանություններին հեռացնելու մասին չի խոսել, իր ասածն իր անձնական կարծիքն է, իսկ Շահրամանյանը խոսել է Հայաստանի իշխանությունների հետ համագործակցության ուղիների գտնելու մասին: