«Ասողը ղալաթ է անում, Վարդան Ղուկասյանը նման բան չի ասում, ես չեմ լսել»․ Ամալյա Սարգսյան

«Մեզ հետ դժբախտություն էր պատահել, իմ հորեղբայրը մահացել էր, ես մեկնել եմ ՌԴ, մասնակցել եմ հուղարկավորությանը և վերադարձել»: Այս մասին լրագրողների հետ զրույցում ասաց ավագանու «Հանրային ձայն» խմբակցության անդամ Ամալյա Սարգսյանը՝ անդրադառնալով բացակայություններին։ Նա հայտարարել էր, որ վայր է դնում ավագանու անդամի մանդատը: Ամալյա Սարգսյանը վստահեցրեց, որ իր նկատմամբ ճնշումներ չեն գործադրվել։

«Ո'չ Վարդան Ղուկասյանը, ոչ ուրիշ այլ անձ ինձ վրա ճնշում չեն գործադրել։ Եթե անգամ ձեզ նման բան ասեն՝ չհավատաք»,- ասաց նա:

Ամալյա Սարգսյանը չկարողացավ հստակ պատասխանել հարցին, թե ի՞նչ տեղի ունեցավ «Հանրային ձայնի» հետ ու ինչու այն պառակտվեց, բայց խմբակցությունը կշարունակի իր աշխատանքը: 

«Խմբակցությունը միշտ աշխատել է հօգուտ Երևանի ու երևանցու: Վահան Ավագյանն իմ կնքահայրն է, Վահե Եսայանն իմ ընկերն է, որոնց ես շատ սիրում, հարգում եմ և շարունակելու եմ հարգել ու սիրել: Իմ հրաժարականը չի նշանակում, որ ընկերական, մարդկային հարաբերությունները դրանով պետք է ավարտվեն»,-ասաց նա։

Դիտարկմանը, թե «Հանրային ձայնի» այդ երկու անդամներին դավաճանության և ՔՊ-ին օժանդակելու մեջ են մեղադրում, Ամալյա Սարգսյանը կտրուկ արձագանքեց․ «Ղալաթ են անում: Ասողը ղալաթ է անում: Վարդան Ղուկասյանը նման բան չի ասում, ես չեմ լսել»,- ասաց նա։