Նավթալինի հոտ է գալիս, ծիծաղելի է. Վարդան Ղուկասյանը` որդու մասնակցությամբ ծեծկռտուքի մասին

«Մեզ զրպարտելու մեթոդներից նավթալինի հոտ է գալիս, ծիծաղելի է արդեն, որդիս ոչ մի ծեծկռտուքի մասնակից չի եղել »,- newspress.am-ի հետ զրույցում ասաց Գյումրու նախկին քաղաքապետ Վարդան Ղուկասյանը: 

Ըստ նրա՝ օդում կախված պնդումներ են անում իր ընտանիքը սևացնելու համար, հիմնական պատճառն էլ այն է, որ առջևում ընտրություններ են. 

«Մենք ավելի վատ բաների ենք սպասում միչև ընտրությունները»,-ասաց նա: 

Վարդան Ղուկասյանը նաև վստահաբար ասաց, որ ոչ մի վկա չկա, ով կասի, թե իր որդին մասնակից է եղել ծեծկռուքին. «Էտ տղաների մասին, որ խոսում եք, իմ տանն են մեծացել, ես իրանց համար ավելի շատ բան եմ արել, քան իրանց հայրերը»:

Վարդան Ղուկասյանին հիշեցրինք, որ ոստիկանությունը չի հերքել իր որդու մասնակցությունը միջադեպին` «չգիտեմ` ինչի է ըտենց արել, իրենց հարցրեք»,-պատասխանեց նա:

Հիշեցնենք, որ ըստ ոստիկանության լրատվական ծառայության, 2016թ. փետրվարի 12-ին, ժամը 23.30-ին, ոստիկանության Կումայրիի բաժնում օպերատիվ տեղեկություն է ստացվել, որ փետրվարի 11-ին` կեսօրին, Գյումրիի Ռուսթավելու փողոցում գտնվող մանկական սրճարանում, վիճաբանության ժամանակ նախկինում դատապարտված, 32-ամյա Սպարտակ Ղ.-ն իր ընկերոջ՝ 29-ամյա Պատվական Մ.-ի հետ մահակներով ծեծի են ենթարկել 1979 թ. ծնված Նորայր Ս.-ին եւ 36-ամյա Գարիկ Բ.-ին: Այնուհետեւ նույն օրվա գիշերը Գարիկ Բ.-ն գնացել է Սպարտակ Ղ.-ի հորը` 1961 թ. ծնված Վարդան Ղ.-ին պատկանող, նախկին դատարանի տարածքում գտնվող գրասենյակ, որտեղ կրկին տեղի է ունեցել վիճաբանություն, որի ընթացքում Վարդան Ղ.-ի թիկնապահները ծեծի են ենթարկել Գարիկ Բ.-ին:

Նույն օրը Վարդան Ղ.-ն Սպարտակ Ղ.-ի հետ ծեծել են 1970 թ. ծնված Արթուր Թ.-ին, իսկ 1982 թ. ծնված Կոլյա Ղ.-ն ծեծի է ենթարկել «Սլաբոտկա» թաղամասի բնակիչներից մեկին: Փետրվարի 16-ին նյութերի նախապատրաստման ընթացքում Պատվական Մ.-ն, Արթուր Թ.-ն, Նորայր Ս.-ն եւ Գարիկ Բ.-ն բացատրությաններ են տվել, որ փետրվարի 11-ին իրենք որեւէ մեկի հետ չեն վիճաբանել, իրենց ոչ ոք չի հարվածել կամ հրել: Պատվական Մ.-ին, Արթուր Թ.-ին, Նորայր Ս.-ին, Գարիկ Բ.-ին տրվել են դատաբժշկի ուղեգրեր: Վարդան Ղ.-ն եւ Սպարտակ Ղ.-ն բաց են թողնվել: Ձեռնարկվում են միջոցառումներ թիկնապահների ինքնությունը պարզելու, նրանց եւ Կոլյա Ղ.-ին հայտնաբերելու ուղղությամբ: Նախապատրաստվում են նյութեր: