ՀՀ դիվանագիտությունը կաղում է, իսկ դիվանագետների դրամական միջոցները` վարգում

Բարձրաստիճան պաշտոնատար անձանց էթիկայի հանձնաժողովը հրապարակել է ԱՄՆ-ում արդեն նախկին ՀՀ դեսպան Տիգրան Սարգսյանի հայտարարագիրը:
Մինչև դեսպան նշանակվելը Տիգրան Սարգսյանը ավտոմեքենա չի գրանցել, իսկ դեսպան եղած ժամանակ գնել թանկարժեք RANGE ROVER Supercharged 5.0 ավտոմեքենա: Մեկ ու կես տարվա ընթացքում Տիգրան Սարգսյանի հանձնած փոխառությունների չափը կազմել է ավելի քան 917 հազար ԱՄՆ դոլար:

Դեսպան լինելու ընթացքում անփոփոխ է մնացել Տիգրան Սարգսյանի բաժնետոմսերի գումարը՝ 6 միլիոն 390 հազար դրամ, ինչպես նաև անշարժ գույքը՝ երկու բնակարան, երկու առանձնատուն, ավտոտնակ և հողամաս:

Իհարկե 917 հազար ԱՄՆ դոլար ունեցողի համար միջինում 100 000 դոլար վճարելը մեքենայի համար անհնար չէ, սակայն, եթե գումար աշխատելու ակնկալիք չկա, ունեցվածքի 10 տոկոսը չի վճարի մեքենայի համար:

Տիգրան Սարգսյանի եղբայրը` Արմեն Սարգսյանը, ով 2008 թ.-ից Չինաստանի Ժողովրդական Հանրապետությունում Հայաստանի արտակարգ և լիազոր դեսպանն էր (համատեղության կարգով Հայաստանի Հանրապետության դեսպան Վիետնամի Սոցիալիստական, Կորեայի և Սինգապուրի Հանրապետություններում), օրեր առաջ ազատվեց դեսպանի պաշտոնից և առայժմ նոր նշանակում չունի: Ըստ գույքի ու եկամուտների հայտարարագրի՝ Արմեն Սարգսյանը համալրել է հարուստ դեսպանների շարքը:
Հիշեցնենք, որ Արմեն Սարգսյանի տարեկան եկամուտները անշեղորեն աճել են և եթե 2011թ-ին նրա հաշվին եղել է 11 մլն 480 հազար դրամ`տարեսկզբի 10 մլնի փոխարեն, 110 հազար դոլար` 85 հազարի փոխարեն, 40 հազար չինական յուան` 38 հազար յուանի փոխարեն և 10 հազար եվրո:

Ապա 2013թ-ին Արմեն Սարգսյանի դրամական միջոցները կազմել են 17.000.000 դրամ, 85.000 դոլար, 220.000 յուան, 7.000 եվրո:
Դեսպանի եկամուտները հարկային տարում կազմել են 200.240 յուան (մոտ 220 հազար դոլար):

Երկու դեսպանի դեպքում էլ եկամուտների զգալի աճ է արձանագրվել և ընդհանրապես, որևէ դեսպանի գործունեությունը և ունեցվածք ուսումնասիրելիս, պարզ է դառնում, որ ունեցվածքը մի քանի քայլով առաջ է ընկած նրա գործունեությունից և զբաղեցրած պաշտոնից:
Արդեն գաղտնիք էլ չէ, որ ՀՀ շատ դեսպաններ արտերկրում զբաղվում են մասնավոր բիզնեսով և ոչ միշտ են սիրահոժար զբաղվում Հայաստանի կենսական կամ տվյալ երկրում ՀՀ քաղաքացիների խնդիրներով: Շատ հաճախ է, որ դեսպաններ են նշանակվում ոչ դիվանագիտական կրթություն ստացած անձինք, որի հետևանքով էլ ՀՀ դիվանագիտությունը կաղում է, իսկ ՀՀ դիվանագետների դրամական միջոցները` վարգում: