ՀՅԴ-ի բեռը ՀՀԿ-ի հետ ճանապարհային քարտեզում

Երեկ ԱԺ Դաշնակցություն խմբակցության պատգամավոր Արծվիկ Մինասյանը հայտարարել էր, որ ՀՅԴ-ն իշխանությունների հետ ստորագրելու է համագործակցության համաձայնագիր, որտեղ ներկայացված կլինի նաև ճանապարհային քարտեզ, թե ինչպես են ուժերը պատկերացնում պետության, ժողովրդի առջև ծառացած խնդիրների լուծումը:

Արծվիկ Մինասյանի ասածներից հատկանշականն այն է, որ մինչ այս Դաշնակցությունը գոնե խուսափում էր կոալիցիա բառից, խոսում էր համագործակցության մասին, իսկ այժմ ճանպարհային քարտեզի մասին են անգամ խոսում: Ասում են՝ Հանրապետականի հետ նույն մայթով կարելի է քայլել:

Newspress.am-ը փորձեց կապ հաստատել ՀՅԴ մարզային կառույցների ներկայացուցիչների հետ: ՀՅԴ Հրազդանի կոմիտեի նախագահ Արսեն Դանիելյանը նշեց, որ ՀՀԿ-ՀՅԴ համագործակցության վերաբերյալ հարցերին չի ուզում անդրադառնալ: Մարզային կառույցների ներկայացուցիչներից մեզ հաջողեց կապ հաստատել նաև Արագածոտնի մարզի մարզային կոմիտեի Սասունիկ համայնքի դաշնակցական ներկայացուցիչ Բաբայան Ալիկի հետ: Սակայն վերջինս ասաց, որ ներկայացնելու է իր անձնական տեսակետը:

«Ոգևորված չեմ, որ ՀՅԴ-ն ՀՀԿ-ի հետ հուշագիր է ստորագրելու, բայց լավատեսորեն եմ տրամադրված , եթե այդպես են որոշել, ուրեմը հույսեր են կապում»,- մանրամասնեց նա:

Վերջինս նաև ասաց, որ Դաշնակցության համար սա բարդ որոշում է, մի շարք մտավախություններ կան. «մասնավորապես այն, թե այս անգամ էլ կոալիցիա կազմելով Դաշնակցությունը կարող է ինքնուրույն որոշումներ կայացնել, արդյունավետ ընթացքով գործել, բայց ուզում եմ հավատալ, որ լավ է լինելու, բայց կրկնեմ` Դաշնակցությունը ծանր բեռի տակ է ընկնում»:

Նա նաև չառարկեց, որ Դաշնակցությունը կարող է հեղինակզրկվել ՀՀԿ-ի հետ հուշագրի պատճառով: