Սուրիկ Խաչատրյանը կապ չունի իմ ազատման հետ. Գորիսի համալսարանի նախկին ռեկտոր

«Ես իմ դիմումի համաձայն տեղափոխվել եմ այլ աշխատանքի և ոչ-ոք ինձ չի ազատել»,- newspress.am-ի հետ զրույցում ասաց Գորիսի պետական համալսարանի նախկին ռեկտոր Յուրա Սաֆարյանը, անդրադառնալով իր պաշտոնից ազատման մասին լուրերին:

Նա նկատեց, որ 27 տարի արդեն այդ բուհ-ում է աշխատում: Այս տարի էլ իր ռեկտոր լինելու երկրորդ 5 տարին էր լրանում և միևնույնն է` այդ հարցը պետք է իր առջև դրվեր սեպտեմբերին:

«Ինձ պարզապես փոփոխություն էր պետք: Ուզում եմ տեղափոխվել աշխատանքի Երևանում. հարմար առիթը եղել է` տեղափոխվել եմ… պարապ չեմ նստելու»,- ասաց Սաֆարյանը:

Չնայած ռեկտորի փոփոխության «անհագուրդ» ցանկությանը, նա այնուամենայնիվ ափսոսանքով էր հետ նայում:

«Երբ մտա 2 մասնագիտություն կար, իսկ հիմա արդեն 13 մասնագիտություն կա, ֆինանսականը նորմալ է, ամեն ինչ լավ է, նորմալ է ներսում…»,- մեզ հետ զրույցում պատմում էր արդեն նախկին ռեկտորը:

Դիտարկմանը, թե ճնշումներ չեն եղել իր որոշման կայացման գործում, հատկապես, երբ նա այն եզակիներից է, ով բացեիբաց քննադատում է Սյունիքի մարզպետ Սուրիկ Խաչատրյանին (Լիսկային), Յուրա Սաֆարյանը պատասխանեց.

«Ես չեմ կարող իրա մասին ոչ դրականը ասել, ոչ բացասականը: Ամեն մարդ իրա դերակատարությունն ունի: Բայց այս գործում ինքը դերակատարում չի ունեցել: Ինքն էլ է ասել էդ մասին, որ ոչ մի կապ չունի իմ ազատման հետ»,- նկատեց Յուրա Սաֆարյանը` հավելելով, որ տարիներով չի հանդիպել մարզպետին, իսկ խոսակցություններն էլ հաշվի չի առնում: