Ինձ չի հետաքրքրում, թե Ադրբեջանի էդ մանկլավիկը ինչ սանկցիաներ կկիրառի. ինչ արել եմ՝ լավ եմ արել

«Ես ոչինչ չեմ պարզաբանում, ոչինչ չեմ մեկնաբանում: Ինձ չի հետաքրքրում, թե ինչ է մտադիր անել ԵԽԽՎ հանձնաժողովի ղեկավարությունը»:

Խոսելով ԵԽԽՎ-ում Թուրքիայի պատվիրակության կողմից ներկայացված բողոքին newspress.am-ի հետ զրույցում ասաց ԵԽԽՎ Բյուրոյի հայաստանյան պատվիրակության անդամ Նաիրա Զոհրաբյանը:

Նա նկատեց, որ իր դեմ կիրառվելիք պատժամիջոցների մասին ոչինչ չգիտի և խնդիրն իրեն չի էլ հետաքրքրում:

«Ինչ որ ես ասել եմ` թուրքական պատվիրակության հայազգի ներկայացուցիչ Մարգար Եսայանին, մնում է ուժի մեջ, ես իմ խոսքի տերն եմ,
ճիշտ եմ արել… »,- ասաց Նաիրա Զոհրաբյանը՝ հավելելով, որ ազգությամբ հայը բարոյական իրավունք չուներ կողմ քվեարկելու Ուոլթերի հակահայ նախագծին, որով Ղարաբաղը ճանաչվում է Ադրբեջանի մաս:

«Ինչ-որ արել եմ, ճիշտ եմ արել, անհրաժեշտության դեպքում պատրաստ եմ կրկին նույնը անել: Իսկ ԵԽԽՎ ղեկավարությունը ազատ է իմ նկատմամբ ցանկացած սանկցիա կիրառելու, դա ինձ բացարձակապես չի հետաքրքրում: Եվ չի մտահոգում, որ մի հատ էլ նստեմ մտածեմ, թե Ադրբեջանի էդ մանկլավիկ Պեդրո Ագրամունդը ինչ սանկցիաներ է որոշել իմ դեմ կիրառել բացարձակապես չի հետաքրքրում»,-եզրափակեց Զոհրաբյանը:

Հիշեցնենք, որ ԵԽԽՎ-ում Թուրքիայի պատվիրակությունը բողոք է ներկայացրել ԵԽԽՎ Բյուրո Նաիրա Զոհրաբյանի պահվածքի հետ կապված։ Թուրքական կողմը բողոքել է, որ Զոհրաբյանը վիրավորել է Թուրքիայի մեջլիսի պատգամավոր Մարգար Եսայանին, ով կողմ էր քվեարկել Ուոլթերի «Բռնության աճը ԼՂ-ում եւ Ադրբեջանի մյուս գրավյալ տարածքներում» բանաձևին։
Հայտնի է նաև, որ ԵԽԽՎ նախագահ Պեդրո Ագրամունդը վճռական է տրամադրված և չի բացառվում, որ հարցը տեղափոխվի ԵԽԽՎ կանոնակարգային հանձնաժողով ու ԵԽԽՎ ապրիլյան նստաշրջանում Զոհրաբյանի դեմ պատժամիջոցներ կիրառվեն: