Ռուսաստանից բերված մեքենաների համար կշարունակենք ԱԱՀ գանձել. Ֆինանսների փոխնախարար

«Պաշտոնապես հայտարարում եմ` այստեղ որևէ շեղում կամ բացթողում չենք ունեցել, ամեն ինչ արվել է պետական բյուջեի շահերից ելնելով, իրավական տողին, տառին համապատասխան»,-Հայաստանի Հանրային Հեռուստաընկերության «Հարցազրույց» հաղորդման ժամանակ հայտարարել է ֆինանսների փոխնախարար Արմեն Ալավերդյանը` անդրադառնալով հարցին, թե ըստ տեղեկությունների` թերացումներ են եղել ԵՏՄ անդամ երկրներից ավտոմեքենաներ ներկրելու հարցում, խնդիր է առաջացել հարկատեսակի կիրառման հետ:

Մանրամասնենք, որ խոսքը ավտոմեքենա ներմուծման ժամանակ ՀՀ-ի կողմից 20 տոկոս ավելացված արժեքի հարկ գանձելու մասին է: ԵՏՄ նախարար Տատյանա Վալովայան վերջերս հայտարարեց, որ ԱԱՀ-ի հարկումը հակասում է ԵՏՄ իրավապայմանագրային պահանջներին:

Արմեն Ալավերդյանը նաև հավելել է. «Մենք ինչ ենք արել. երրորդ երկրներից ավտոմեքենաները ներմուծվում էին, նախորդ տարի 44-45 միլիարդի փոխարեն ներմուծվել է 22 միլիարդ, արդյունքում շուրջ 20 միլիարդից ավելի գումար կորցրեցինք, պատճառներից մեկն էլ այն էր, որ ավտոմեքենաների մի մասը երրորդ երկրներից չներմուծվեցին, ներմուծվեցին պարզապես Ռուսաստանի Դաշնությունից:

Իսկ ԵՏՄ երկրներից Հայաստան ապրանքներ ներմուծելիս սահմանի վրա մաքսատուրք չի գանձվում, սակայն գանձվում է ԱԱՀ: Տարբերությունն այն է, որ եթե Գերմանիայից է ներմուծվում, ապա այս պահին այդ գումարը գանձվում է տասն օրվա ընթացքում, իսկ երբ ավտոմեքենան ներմուծվում է ՌԴ-ից, գումարը կարող է վճարվել ներմուծման ամսվան հաջորդող ամսի 20-ը»:

Հարցին, թե Միության տարածքում ինչո՞ւ Է գանձվում ԱԱՀ, Արմեն Ալավերդյանը պատասխանել է. «Անցումային դրույթներով մենք այդ իրավունքն ունենք և այն պահպանելու ենք: Դա մեր եկամտային կարևորագույն հոդվածներից մեկն է, եթե նայենք ԵՏՄ-ի օրենսդրությունը, ապա կարգավորումների մեջ Հայաստանի Հանրապետությունը ոչ մի խախտում չի արել»:

Խախտումը հենց այս հոդվածում է. ըստ ԵՏՄ սահմանված կարգի, 6-րդ հոդվածի 72-րդ կետի 2-րդ պարբերության համաձայն, ԵՏՄ անդամ երկրներից ՀՀ ֆիզիկական անձանց կողմից ներկրվող այն ապրանքները, որոնք նախատեսված չեն ձեռնարկատիրական գործունեության համար, այլ անձնական, ընտանեկան կամ այլ օգտագործման նպատակով են ներկրվում, հարկվում են ԵՏՄ այդ երկրում ու այդ երկրի հարկային դաշտին համապատասխան, որտեղից որ գնել են, ու ՀՀ_ում այլևս հարկման ենթակա չեն։

Փաստի առնչությամբ իր զարմանքն է արտահայտել ԵՏՄ տնտեսական ու ֆինանսական քաղաքականության հանձնաժողովի կոմիտեի նախագահ Թիմուր Սուլեյմանովը։

Խնդրի առնչությամբ ԵՏՄ ֆինանսների ու էկոնոմիկայի հանձնաժողովը դիմել է ՀՀ ֆինանսների նախարարությանը` պահանջելով կարգավորել հարցը, պարզաբանում տալ ու տարածքային հարկային մարմիններին բացատրական նամակներ հղել։ Հանձնաժողովը մինչ օրս պատասխանի է սպասում, իսկ հայկական կողմը համառորեն լռում է։ Ըստ ռուս-հայկական իրավաբանների «АрмРосс» միության նախագահ Կարեն Ներսիսյանի, նման իրավիճակում հայտնված քաղաքացիներն անհապաղ պիտի դիմեն դատարան ու նրանց մեկ ամսվա ընթացքում պարտավոր են վերադարձնել ոչ միայն ապօրինի գանձված հարկը, այլ նաև փոխհատուցել դատական ծախսերը։