Բարձիթողի վիճակ ու բազում խնդիրներ՝ ոչ միայն սառցալեզվակների տեսքով․ ականջդ կանչի, Ռուբեն Հայրապետյան (տեսանյութ)

«Հայաստանի ֆուտբոլի ֆեդերացիայի Տեխնիկական կենտրոն-ակադեմիայի» մարզադաշտը հայտնվել է բարձիթողի վիճակում։ Այստեղ, ուր հազարավոր երեխաներ ու ֆուտբոլասերներ են հաճախում, չեն իրականացվել ձնամաքրման աշխատանքներ։ 

NEWSPRESS.am-ի թղթակիցը նկարել է կադրեր, որտեղ երևում է, թե ինչպես են սառցալեզվակները կախվել տանիքից՝ ամեն պահի պատրաստ ընկնելու։ Ու Ֆուտբոլի ֆեդերացիայի տնօրինությունը թքած ունի, թե դրանք կարող են վնասել ներքևում կայանված մեքենաներին կամ, որ ավելի վատ է, այդ հատվածով անցնող մեծահասակներին ու երեխաներին։

Հայկական Ֆուտբոլի ու ֆեդերացիայի նկատմամբ այս անտաբերությունն ու բարձիթողի վիճակն, իհարկե, միայն սառցալեզվակների տեսքով չէ որոշվում։ Ցավով կարելի է նկատել, որ արդեն տևական ժամանակ ՀՖՖ գնդակի նման գլորվում է ներքև։

Այս ամենն սկսվեց հատկապես այն բանից հետո, երբ ՀՖՖ նախկին նախագահ Ռուբեն Հայրապետյանը հրաժեշտ տվեց պաշտոնին։ Այդ պահից, ՀՖՖ-ն դարձավ անհաջող փոխանցումներով խաղի գնդակ, որտեղ գնդակը ոչ թե փոխանցում էին մեկը մյուսին, այլ խլում իրար ձեռքից՝ կռվելով ՀՖՖ նախագահի պաշտոնի համար։

Ազնիվ լինելու համար պետք է ասենք, որ Ռուբեն Հայրապետյանի պաշտոնավարման օրոք բավականին աշխատանքներ են տարվել ֆեդերացիան վերականգնելու ուղղությամբ։

Հարկ է նկատել, որ «Հայաստանի ֆուտբոլի ֆեդերացիայի Տեխնիկական կենտրոն-ակադեմիայի» մարզադաշտը, որի մասին վերևում արդեն ակնարկեցինք, ևս նրա օրոք է կառուցվել ու շահագործման հանձնվել։ 

Աշխատանքները կատարվել են Հայրապետյանի նախաձեռնությամբ ու ՀՖՖ միջոցներով։ Մարզադաշտը շահագործվում է 2010 թվականից։

Այն ծառայում է որպես Հայաստանի առաջնության բարձրագույն խմբում հանդես եկող «Փյունիկ» թիմի տնային հանդիպումների վայր։ 

NEWSPRESS.am-ի տեղեկություններով, ՀՖՖ ներկայիս տնօրինությունն այս տարածքը պատրաստվում է վաճառել։ Այսինքն՝ ֆուտբոլը զարգացնելու և մարզադաշտը բարեկարգելու փոխարեն, նախագահ Արմեն Մելիքբեկյանը նախընտրում է ազատվել «գլխացավանքից»։ Դե, ինչպես ասում են՝ չկա գլուխ, չկա գլխացավանք։ Էստեղ են ասել՝ ականջդ կանչի, Ռուբեն Հայրապետյան։

Տեսանյութը՝ այստեղ

Արմինե Մկրտումյան