Մենք չենք խաղում և մինչև վերջ կգնանք, որ դասագրքի հրատարկման պատճառ հանդիսացող նախարարը հրաժարական տա․ «Զարթոնք» օրաթերթի խմբագիր

Ամեն կերպ մասնագետները փորձեցին կանխել սկսված գործընթացը և խոտանել 7-րդ դասարանի  «Հայոց պատմության» դասագիրքը։ Այս մասին ԿԳՄՍ նախարարության շենքի դիմաց լրագրողների հետ զրույցում ասաց «Խոտանել խեղաթյուրված դասագիրքը» շարժման անդամ, Լիբանանում «Զարթոնք» օրաթերթի խմբագիր Սևակ Հակոբյանը։ Նա միացել է ԿԳՄՍ նախարար Ժաննա Անդրեասյանի հրաժարականի պահանջին։

Սևակ Հակոբյանը բոլորին կոչ է անում միանալ իրենց նախաձեռնությանը և վստահեցնում է, որ գնալու են մինչև վերջ։

«Մենք տարբեր միջոցառումներ են նախաձեռնել՝ զգուշացնելու նախարարին, որ գիրքը պետք է փոխել։ Մենք հիմա ցույց ենք տալիս, որ կատակ չենք անում և պետք է երթանք մինչև վերջ, տեսնենք՝ ով ավելի շուտ կթուլանա»,- ասաց նա։

Լրագրողի դիտարկամը, թե ժամանակին ընդդիմությունն էլ էր ասում` պետք է գնանք մինչև վերջ, բայց դադարեցրեց պայքարը, Սևակ Հակոբյանը պատասխանեց, որ պետք չէ իրենց համեմատել ընդդիմության հետ։

«Ես սկսեցի հավատալ, որ ընդդիմությունը և իշխանությունը նույն տերերին և ծրագրերին կծառայեն, հետևաբար, ընդդիմությունն իր դերը կխաղա, նախարարը նախարար կխաղա, վարչապետը՝ վարչապետ, մենք չենք խաղում և մինչև վերջ կգնանք, որ դասագրքի հրատարակման պատճառ հանդիսացող նախարարը հրաժարական տա»,- ասաց նա։  

«Զարթոնք» օրաթերթի խմբագիրը նկատում է, որ բոլորը ժամանակավոր են, իսկ հայրենիքը` մնայուն։

«Նախարարն էլ ժամանակավոր է, իշխանությունն էլ, և պետք է հասարակությունը շարժվի իր տեղերից, որ հայրենիքը չկորցնենք։ Հուսահատվիլը մեղք է, մենք կապրինք պատմական թյուրիմացություն մը։ Եթե բոլորս միասին չպայքարենք այս թյուրիմացությունը սրբագրելու համար, մենք հայրենիք պետք է կորցնենք։ Ահագին սերունդ կորցրինք, հայրենիքն էլ կկորցնենք, ով հասկանում է դա, թող գա, միանա և պայքարենք միասին։ Նախարարն էլ ժամանակավոր է, իշխանությունն էլ, ես կհավատամ, որ եթե շուտ շարժվինք, կրնանք հայրենիքը պահել»,- ասաց նա։