ԱՄՆ-ն առաջիկա օրերին Սիրիայում և Իրաքում կհարվածի Իրանի ռազմական կայաններին. Politico

Իրաքի և Սիրիայի սահմանին ամերիկյան ուժերի վրա հարձակման կապակցությամբ ԱՄՆ նախագահ Ջո Բայդենը հրամայել է մշակել պատասխան միջոցներ։ Առաջարկները ներառում են Իրաքում և Սիրիայում իրանական զորքերին հնարավոր հարված հասցնել, գրում է Politico-ն։

Պենտագոնը քննարկում է պատասխան միջոցների մի քանի տարբերակներ, որոնք վճռականորեն կզսպեն այլ հարձակումները և չեն հանգեցնի իրավիճակի հետագա սրմանը Մերձավոր Արևելքում։

Այդ միջոցները կարող են ներառել Սիրիայում կամ Իրաքում իրանցի զինվորականների, ինչպես նաև Պարսից ծոցում իրանական ռազմածովային կայանքների թիրախավորումը:

Politico թերթը հայտնում է, որ ամերիկացի առաջնորդի հավանությունից հետո, ամենայն հավանականությամբ, մի քանի օրվա ընթացքում պատասխան միջոցներ կձեռնարկվեն:

Լրագրողները կարծում են, որ Բայդենը չի խոսի պատասխան միջոցների մասին, քանի դեռ վերջնական որոշում չի կայացվել։ Միաժամանակ թերթը զգուշացնում է, որ պատասխան միջոցները կարող են էլ ավելի սրել իրավիճակը Մերձավոր Արևելքում։