Այժմ Թուրքիան զբաղված է Սիրիայի քրդերով, սակայն թիրախում են նաև սիրիահայերը

Վերջին շրջանում առավել քան հստակ է Թուրքիայի`Սիրիայի հյուսիսային տարածքները իր հսկողության տակ պահելու մտադրությունը: Ըստ որոշ տեղեկությունների, Սաուդյան Արաբիան որոշակի զորք է ուղարկել թուրքական Ինջիրլիկ ռազմաբազա և արդեն Թուրքիան կրակի տակ է պահում սահմանային Աազասա շրջանը, որտեղ քրդական ուժեր կան: Մտավախություն կա, որ Թուրքիան հնարավոր է ներխուժի Սիրիա` թիրախի տակ ունենալով նաև հայաշատ Հալեպ  քաղաքը:

Newspress.am-ը Թուրքիայի հնարավոր ներխուժման և հալեպահայերի հետագա ճակատագրի վերաբերյալ հարցադրումներով դիմեց թուրքագետ Գևորգ Պետրոսյանին: Թուրքագետը նշեց, որ Թուրքիայի անմիջական սահմանին մոտ է Հալեպը և միշտ էլ իր թիրախում է պահել սիրիահայերին: Նման խոշոր և ուժեղ համայնքի գոյությունը թուրքական շահերի դեմ է և մեծ է հավանականությունը, որ հայերը կհայտնվեն թուրքական թիրախում, ինչպես արդեն եղել է նախկինում:

Գ. Պետրոսյանը նաև նշեց, որ Սիրիա Թուրքիայի հնարավոր ներխուժման դեպքում կարող է և կվնասի սիրիահայերին, մասնավորապես Հալեպում ապրող հայերին: Սիրիա Թուրքիայի հավանական ներխուժումը նախընտրելի չէ ոչ հայկական, և ոչ էլ տարածաշրջանային տեսանկյունից:

Հիշեցնենք, որ Թուրքիան սկսել էր կրակի տակ պահել Սիրիայի քրդական դիրքերը, պատճառաբանելով, որ սահմանին թուրք զինվոր է զոհվել: Այս խնդրի վերաբերյալ թուրքագետը նշեց, որ Թուրքիան կարող է բազմաթիվ պատրվակներ գտնել, և մեկով չսահմանափակվել, իսկ վերջին շրջանում բախումները հիմնականում Թուրքիայի և Սիրիայի քրդերի միջև են:

«Թուրքական պետությունը չի կարողանում տանել Սիրիայի քրդերի աճող հզորությունը, միշտ թիրախում է պահում Սիրիայի քրդերին, որոնք Թուրքիայի շահերի դեմ գործոն են»,- ասաց նա, հավելելով, որ Սիրիայի հակամարտության հարցում Թուրքիայի քաղաքականությունը հասկանալու համար պետք է դիտարկել երկու գործոն:

Բաշար Ասադի հեռացումը և թուրքական ազդեցության տարածումը Սիրիայում, և քրդական գործոնը, որը ևս քիչ կարևոր չէ Թուրքիայի համար:
Ինչ վերաբերում է ռուս-թուրքական հարաբերությունների սրացմանը, ապա թուրքագետը նշեց, որ այդ հարաբերություններում ճեղքվածքն ակնհայտ է, սակայն երկու կողմերը չեն գնում լայնածավալ ռազմական գործողությունների, այլ սեփական շահերն են պաշտպանում Սիրիայում:

Իսկ Սիրիա Թուրքիայի հնարավոր ներխուժման դեպքում Հայաստանի դիրքորոշման վերաբերյալ նշեց, որ պետք է հետևել զարգացումներին և առավելագույնս օգտագործեն հնարավորությունները: