Փաշինյանի նախաձեռնած նոր սահմանդրության ընդունման գործընթացն ի սկզբանե տապալված է

«Արդար Հայաստան» կուսակցության նախագահ Նորիկ Նորիկյանը ֆեյսբուքյան իր էջում անդրադարձել է վարչապետ Փաշինյանի՝ նոր սահմանադրություն ունենալու մասին հայտարարությանը․

«Նոր սահմանադրության ընդունման համար անհրաժեշտ է, որ ԱՅՈ քվեարկի շուրջ 648 հազար մարդ…

․․․Կարելի է վստահաբար պնդել, որ Փաշինյանի նախաձեռնած նոր սահմանդրության ընդունման գործընթացն իսկզբանե տապալված է…

Նիկոլ Փաշինյանը երեկ հայտարարեց, որ Հայաստանը կարիք ունի նոր Սահմանադրության, ոչ թե սահմանադրական փոփոխությունների։

Դեռևս հնարավորություն կլինի բովանդակային առումով անդրադառնալ նոր սահմանադրության ընդունման անհրաժեշտությանը, սակայն ընդունման ընթացակարգի տեսանկյունից գրեթե անհավանական եմ համարում նոր սահմանադրության ընդունման հնարավորությունը՝ հետևյալ պատճառաբանւթյամբ.

ՀՀ Սահմանադրության 207-րդ հոդվածի համաձայն՝ Հանրաքվեի դրված ակտն ընդունվում է, եթե դրան կողմ է քվեարկել հանրաքվեի մասնակիցների կեսից ավելին, բայց ոչ պակաս, քան հանրաքվեներին մասնակցելու իրավունք ունեցող քաղաքացիների մեկ քառորդը:

Ընդորում, հարկ է արձանագրել, որ Սահմանդդրության 207-րդ հոդվածը նույնպես ենթակա է փոխոխման բացառապես հանրաքվեի միջոցով։

2021թ․ արտահերթ Խորհրդարանական ընտրությունների ժամանակ ՀՀ ընտրողների թիվը կազմել է 2․595․512 մարդ։

«Հանրաքվեի մասին» Սահմանադրական օրենքի 35-րդ հոդվածի 2-րդ կետի համաձայն՝ Սահմանադրության 207-րդ հոդվածի համաձայն՝ հանրաքվեի դրված ակտն ընդունվում է, եթե դրան կողմ է քվեարկել հանրաքվեի մասնակիցների կեսից ավելին, բայց ոչ պակաս, քան հանրաքվեին մասնակցելու իրավունք ունեցող քաղաքացիների մեկ քառորդը:

Նույն հոդվածի 3-րդ կետի համաձայն՝ Հանրաքվեի դրված ակտը համարվում է չընդունված, եթե ապահովված չեն սույն հոդվածի 2-րդ մասի պահանջները:

Վերը նշված իրավակարգավորումերի լույսի ներքո, ինչպես նաև հաշվի առնելով հանրաքվեին մասնակցելու իրավունք ունեցող քաղաքացիների թիվը, հարկ է արձանագրել, որ Նիկոլ Փաշինյանի՝ նոր սահմանդրության ընդունման մտահղացումն իրականություն դարձնելու համար անհրաժեշտ է, որ այդ նոր սահմանդրությանը ԱՅՈ քվեարկի շուրջ 648 հազար մարդ։

2021թ․ խորհրդարանական ընտրությունների ժամանակ Նիկոլ Փաշինյանը ստացել է 688,761 ձայն, գրեթե այնքան քվե, որքան անհրաժեշտ է հանրաքվեի դրված ակտն ընդունվելու համար։

Կարծում եմ՝ կհամաձայնեք, որ Նիկոլ Փաշինյանի վարկանիշը ներկայումս այն չէ, ինչ 2021 թվականին։

Ավելին, բովանդակային առումով նոր սահմանադրության ընդունման համար անհրաժեշտ է ունենալ գերլեգետիմություն, որն այս պահին Փաշինյանն օբյեկտիվորեն չունի և դժվար էլ այլևս ունենա, հետևաբար՝ կարելի է վստահաբար պնդել, որ Փաշինյանի նախաձեռնած նոր սահմանդրության ընդունման գործընթացն իսկզբանե կարելի է համարել տապալված։

Իմ կարծիքով, որակապես նոր իշխանությունը կարող է ձեռնարկել նոր սահմանդրության ընդունման գործընթաց․․․»,- գրել է նա։