Գյուղում երիտասարդները ազապ են, Դաշտավանը շուտով «Ազապավան» կկոչվի. (տեսանյութ)

Արարատի մարզի Դաշտավան գյուղի բնակիչների թիվ մեկ խնդիրը ոռոգման ջուրն է:

Շուրջ 500 տնտեսություն ունեցող գյուղի ապրուստի միջոցը հողագործությունն է, սակայն արդեն տևական ժամանակ է ինչ գյուղացիները չեն կարողանում մշակել հողը. ոռոգման ջուր չունեն: Դաշտավանում ոչ մի գյուղացի ջրի պարտք չունի, սակայն ավելի քան 300 հեկտար վարելահողերի 70 տոկոսը մնում է անջրդի:
Համայնքը ջրամատակարարման ներքին ցանց, որպես այդպիսին չունի, եղածն էլ տասնամյակների վաղեմություն ունի: Դեռ տաս տարի առաջ գյուղի բնակիչները ոռոգման ջուրը ստանում էին Հրազդան գետից ու բերքատվությունից էլ գոհ էին, սակայն այսօր ստիպված են հույսը դնել արտեզյան ջրերի վրա, որով հազիվ հասցնում են տնամերձ այգիները մշակել ու դրանից ստացած փոքր եկամուտներով էլ գոյատևել, իսկ վարկերի մասին էլ արդեն չեն ուզում խոսել:

Դաշտավանցին, հողից բերք քամելուց բացի, կանգնած է նաև այլ դժվարության առջև: Մայրաքաղաքից ընդամենը 10 կմ հեռավորության վրա գտնվող գյուղում մանկապարտեզ չկա: Գյուղացիներն ստիված երեխաներին տանում են կողքի գյուղի մանակապարտեզ: Թեև դա էլ ոչ բոլորին է հաջողվում. ծանոթով են ընդունում, ասում են գյուղացիներն ու հավելում, որ ճանապարհածախսից բացի հարևան գյուղի մանկապարտեզում երեխայի համար վճարում են 11 հազար դրամ: Մինչդեռ տեղի երեխաների համար վճարը 4000 դրամ է:

Այնպես, որ գյուղի խնդիրներն աչքի առաջ ունենալով` Դաշտավանի երիտասարդները խուսափում են ամուսնանալ: Դաշտավանցիները նույնիսկ կատակում են այդ մասին` գյուղում երիտասարդներ շատ կան, բայց բոլորն ազապ են, շուտով Դաշտավանը «Ազապավան» է դառնալու:

Մանրամասները` տեսանյութում