Ամուլսարը կշահագործվի, կառավարությունն էլ «Լիդիան Արմենիա»-ից դրա դիմաց կստանա կապիտալի 12,5 տոկոսը. Նիկոլ Փաշինյան

Նախապատրաստվում ենք դիտարկել Ամուրսարի հանքավայրի նախապատրաստական, շինարարական ու հետագա շահագործման աշխատանքների հնարավորությունը։ Այդ մասին Կառավարության այսօրվա նիստում ասաց Էկոնոմիկայի նախարարի տեղակալ Անի Իսպիրյանը։ 

Նրա խոսքով՝ ծրագրի արդյունավետ իրագործման համար «Լիդիան Արմենիա» ընկերությունը պատրաստվում է տրամադրել 250 մլն դոլարի չափով ներդրում։

«Ծրագրի շինարարության ընթացքում ընկերությունը պարտավորվել է վճարվող բնապահպանական հարկ տրամադրել ազդակիր համայնքներին՝ բնապահպանական ծրագրերի համար, բացի այդ, տարեկան յոթ միլիոն դոլարի չափով աջակցություն է տրամադրելու այդ համայնքներին։ Հուշագրի շրջանակում ընկերությունը պարտավորվել է նաև Կառավարությանը նվիրատվությամբ տրամադրել իր կանոնադրական կապիտալի 12.5% բաժնետոմսերը։ Նշեմ, որ Կառավարության կողմից ներդրումներ կատարելու որևէ պարտավորություն չկա»,- նշեց փոխնախարարը։

Նիկոլ Փաշինյան էլ հայտարարեց, որ վերջին 6 տարվա ընթացքում պարբերաբար առնչվել են Ամուլսարի հանքի հետ կապված խնդիրներին, եղել են բազմաթիվ մտահոգություններ ու կառավարությունը գնացել է բոլոր մտահոգությունների հետևից։

«Այն ժամանակ, երբ մենք բոլոր հարցերի պատասխանները ստացել ենք, հնարավոր ենք համարել նախագծի շարունակումը։ Շատ ողջունելի է, որ ներդրողները ցանկացել են, որ Հայաստանի ժողովուրդը՝ ի դեմս կառավարության, մասնակցություն ունենա ու բաժնեմաս ունենա նախագծի մեջ»,- ասաց նա։

Փաշինյանի խոսքով՝ ամեն տարի ազդակիր համայնքներին կվճարվի 7 միլիոն դոլար։

«Տվյալ դեպքում ազդակիր համայնքներն են Ջերմուկը, Սիսիանը և Վայքը»,- ասաց նա։

Ամուլսարի հանքի շահագործումն այս մոդելով, ըստ  Փաշինյանի, բազմաթիվ մտահոգություններ է փարատում ու լրացուցիչ խթան կհանդիսանա Հայաստանի տնտեսական աճի ու տնտեսական զարգացման համար։

«Մենք հույս ունենք, որ, իսկապես, Ամուլսարի հանքը կլինի հանքարդյունաբերության ոլորտում նոր ստանդարտների ներդրման հարթակ, կառավարությունն այս հարցում կլինի հետևողական»,- ասաց Փաշինյանը։