Ձեր օրոք չծառայածը վճարում էր 100․000 դրամ, իմ առաջարկած նախագծով կվճարի 15 մլն դրամ․ Հայկ Սարգսյանն ասաց, թե ինչու պետք է ընդդիմադիր պատգամավորները կողմ քվեարկեն իր նախագծին

Հարգելի ընդդիմադիր պատգամավորներ, հիմա հակիրճ կներկայացնեմ մի քանի հիմնավորում, թե ինչու դուք պետք է կողմ քվեարկեք այս օրենքի նախաձեռնությանը։ Այս մասին ԱԺ ամբիոնից, դիմելով ընդդիմությանը, ասաց իշխանական պատգամավոր Հայկ Սարգսյանը։

«Նախագծի ընդունումը հնարավորություն կտա 27 տարին լրացած  և պարտադիր զինվորական ծառայությունից խուսափած քաղաքացիներին, ծառայելով ԶՈւ-ում  կամ գումար վճարելով, ազատվել քրեական պատասխանատվությունից։ Եթե քաղաքացին ծառայի երկու տարի, որևէ գումար չի մուծի, եթե չցանկանա կամ չկարողանա ծառայել, կմուծի 15 մլն, ի տարբերություն Ռոբերտ Քոչարյանի նախագահության օրոք 2004թ-ին ընդունված և Սերժ Սարգսյանի նախագահության 10 տարիներին գործած այն օրենքի, որով քաղաքացին ամեն բացակայած զորակոչի համար վճարում էր 100,000 դրամ՝ ազատվելով պատասխանատվութունից։ Ձեր ժամանակ չծառայածը  վճարում էր 100,000 դրամ, իմ առաջարկված տարբերակում նա պետք է վճարի 15 մլն դրամ կամ՝ 15 անգամ ավելի»,- ասաց պատգամավորը։

Սարգսյանը նշեց, որ նախագով լուծվում է հաշվառման չկանգնած քաղաքացիների ծառայության չտանելու հարցը։

«Ունենք բազմաթիվ քաղաքացիներ, ովքեր հաշվառման չեն կանգնում մինչև իրենց 27 տարին լրանալը, հետևաբար չեն ծառայում։ Հետաքրքիր զուգադիպությամբ նրանք բոլորը ներկայանում և հաշվառման էին վերցվում 27 տարին լրանալուց հետո՝ այսպիսով ազատվում ծառայելու պարտավորությունից։ Նախագծի ընդունման դեպքում նրանք նույնպես պարտավոր կլինեն ծառայել, եթե անգամ հաշվառման վերցեն  27 տարին լրանալուց հետո։

Այս փոփոխությունը նույնպես կհամալրի ԶՈւ շարքերը և լրացուցիչ ֆինանսական մուտքեր կապահովիի պետբյուջե։ Գործող կարգավորումներով այն անձինք, ովքեր մինչև հաշվառման վերցվելը, հրաժարվում են ՀՀ քաղաքացիությունից և դիմում են քաղաքացիության համար, 27 տարին լրանալուց հետո չեն ծառայում և ազատվում են ծառայելու պարտավորությունից։ Նաև այն անձինք, ովքեր դիմում և ստանում են ՀՀ քաղաքացիություն  27 տարին լրանալուց հետո, նրանք նույնպես չեն ծառայում, սա անարդարացի կարգավորում է։ Նախագծի ընդունմամբ այս մարդիկ նույնպես պարտավոր կլինեն ծառայել  կամ գումար վճարելու։ Թվարկածս հիմանավորումներին դուք չեք կարող բերել  որևէ հակափաստարկ, որ ինձ հետ բանավեճում կյանքի իրավունք կունենա, հետևաբար  պետության շահը ասում է, որ այս օրենքին պետք է քվեարկեն բոլոր այն պատգամավորները, ում համար առաջնային է պետական շահը։ Սիրում ես հայրենիքդ՝ կողմ քվեարկիր այն նախաձեռնությանը, որն ի շահ քո պետությանն է»,- ասաց Սարգսյանը։