Տկար ու անկազմակերպ Հայաստանը չի կարող մեր ազգի իրավունքների պահանջատերը դառնալ

Համահայկական մտածողության ու գործելակերպի մշակումը պիտի նպաստի թե՛ Հայաստանի հզորացմանը, թե՛ մեր ազգի միասնականության ամրապնդմանը եւ թե ազգային պահանջատիրությանը: Այս մասին, փետրվարի 13-14-ին, Մեծի Տանն Կիլիկիո կաթողիկոսության Անթիլիասի Մայրավանքում տեղի ունեցած Հայոց ցեղասպանության 100-ամյակի արժեւորմանը նվիրված համագումարի եզրափակիչ նիստի ժամանակ նշել է Մեծի Տանն Կիլիկիո կաթողիկոս Արամ Ա-ն:

«Նման մոտեցում նախ ենթադրում է մեր ժողովրդի ներքին դրվածքի, կացության ու հնարավորությունների, ինչպես նաեւ ներկա աշխարհաքաղաքական պայմանների իրատես արժեւորումը»,- ասել է նա:

Նորին Սրբությունը հիշեցրել է, որ «ազգային պահանջատիրությունն իր նեղ շրջագծի մեջ պետք չէ դիտել։ Ազգային պահանջատիրություն նշանակում է որպես ազգ ու հայրենիք ինքնահաստատում ու ինքնահզորացում, գոյության ամրացում, կյանքի բարգավաճում եւ մեր բռնաբարված իրավունքների վերականգնում ու միջազգային համայնքի ներսում մեր ազգի ու հայրենիքի ներկայության ամրապնդում»։

Այս համապարփակ մոտեցումով Արամ Ա Կաթողիկոսն առաջին հերթին ընդգծել է. «Հայաստանի հզորացումը որպես մեր ազգային պահանջատիրական պայքարի հիմք։ Տկար, մեկուսացած ու անկազմակերպ Հայաստանը չի կարող մեր ազգի իրավունքների պահանջատերը դառնալ. չի կարող հարգանք պարտադրել ու լսելի դառնալ միջազգային համայնքում։ Հետեւաբար Հայաստանի հզորացումը իր տնտեսական, զինվորական եւ այլ բնագավառներով հրամայական անհրաժեշտություն է։ Այս իրագործելու համար արտագաղթի կասեցումը, կոռուպցիայի վերացումը ու Սփիւռքի առավել կազմակերպ զորակցությունը Հայաստանի համար կենսական են»։