«Սա կարևոր սոցիալական ծրագիր է»․ Ավինյանը շատ է սիրում «Արարատ» ակումբը, բայց պետք է քանդի թենիսի կորտերը

Երևանի քաղաքապետ Տիգրան Ավինյանը պնդում է՝ դեռ չի տեսել, որ որևէ մի ներդրող առաջարկի 8-9 մլն դոլար ներդնել կանաչ տարածքների վերականգնման համար և չպահանջի էական բիզնես կոմպոնենտ: 

Նրա խոսքով` Երևանի Օղակաձև զբոսայգու 4-րդ հատվածում «Արարատ» ակումբի թենիսի կորտերը քանդելու նախաձեռնությունը սոցիալական ծրագիր է։

«Յուրաքանչյուր մարդ, որ մի փոքր հասկանում է նման գործընթացներից, պետք է նաև փաստի, որ սա կարևոր սոցիալական ծրագիր է: Երևանում շատ քիչ կհանդիպենք ծրագրերի, որ որոշակի բիզնես-ընկերություն պատրաստ է որոշակի սոցիալական պատասխանատվություն ստանձնել և մեծ գումարներ ներդնել հանրային տարածքներ վերականգնելու համար, որոշակի հասարակական տարածքներ ներառելով, որպեսզի հետագա սպասարկումն իրականացվի այդ հանրային տարածքների: Նման ծրագրերը ողջունելի են:

Ինչքան էլ ես սիրեմ «Արարատ» ակումբը, և ինչքան էլ իմ հուշերը կապված լինեն այդ ակումբի հետ, գնդակները, որ ընկնում էին Գետառը, և երջանկահիշատակ ընկեր Վիլիկին, այնուամենայնիվ, Օղակաձև զբոսայգին միակ հանրային տարածքն է, որ փոքր կենտրոնն ունի: Այդ տարածքը պետք է վերականգնվի որպես հանրային այգի բոլոր հատվածներում»,- ասաց նա:

Ավինյանը տեղյակ է խնդրի հետ կապված հնչեցված բոլոր մեղադրանքներից։ Նա խոստացավ դրանք ընդունել ի գիտություն, բայց և, միևնույն ժամանակ, հետ չի կանգնում իր որոշումից։

«Պետք է գալ այն հիմնական նպատակադրումից՝ հանրային տարածքների վերադարձ հանրությանը: Սա ճիշտ ծրագիր է: Թենիսի կորտերի հարցը մենք կլուծենք: Հենց հիմա կֆիքսենք հանձնարարական շինբարեկարգության վարչությանը, որպեսզի բացի նրանից, որ «Արարատ» ակումբը վերանորոգում ենք, մեր թենիս պարապողների համար կրկնակի դրա չափով թենիսի կորտեր կառուցենք Երևանում:

Բոլոր նրանց, որ ճանճերի նման հավաքվել էին այս թեմայի շուրջ, որպեսզի որոշակի փոքրիկ քաղաքական դիվիդենտներ շահեին, ցավով պետք է նշեմ, որ դա չի ստացվի»,- ասաց քաղաքապետը:

Հիշեցնենք, որ օրեր առաջ NEWSPRESS.am-ը տեղեկացրել էր, որ տարածքն առանց մրցույթի տրվելու է Երևանին 254 մլն դրամ նվիրաբերած Evocabank-ի բաժնետիրոջը: