Ջհանգիրյանը ընդունում է, որ ոչ թե քաղբանտարկյալ, այլ սովորական կրիմինալ է

Ուրբաթ օրը պետաիրավական հարցերի հանձնաժողովում քվեարկությամբ որոշվեց Մարդու իրավունքների պաշտպանի թեկնածու առաջադրել արդարադատության փոխնախարար Արման Թաթոյանին: Նրա թեկնածությանը կողմ էին քվեարկել հանձնաժողովի 12 անդամներից 7-ը, իսկ Զարուհի Փոստանջյանի թեկնածությանը կողմ քվեարկեցին հանձնաժողովի 5 անդամներ:

Փոստանջյանի թեկնածությունն առաջադրել էր անկախ պատգամավոր Էդմոն Մարուքյանը և պաշտպանել էր ՕԵԿ խմբակցությունը: ԲՀԿ խմբակցության ներկայացուցիչ, «Ալյանս» կուսակցության նախագահ Տիգրան Ուրիխանյանն առաջադրել էր Նարեկ Ալոյանին, ում թեկնածության օգտին քվեարկեցին Ուրիխանյանը և Արծվիկ Մինասյանը: Ի դեպ Արծվիկ Մինասյանը կողմ էր քվեարկել բոլորի թեկնածությանը:
Որոշիչ էր լինելու ՀԱԿ-ի ձայնը, սակայն ՀԱԿ-ը առհասարակ չմասնակցեց քվեարկությանը: Եթե ՀԱԿ-ից Գագիկ Ջհանգիրյանը ձայնը ընդդիմադիր գործընկերոջը տար հաշիվը 6-6 կլիներ: ՀԱԿ անդամ Գագիկ Ջհանգիրյանը նաև հայտարարեց, որ  խմբակցությունը չի մասնակցի խորհրդարանի լիագումար նիստում Մարդու իրավունքների պաշտպանի ընտրությանը, քանի որ քննարկել է և որոշել է չներկայացնել Մարդու իրավունքների պաշտպանի սեփական թեկնածուին:

Դժվար է ասել ակամայից, թե միտումնավոր Ջհանգիրյանը հանրապետականների ջրաղացին ջուր լցրեց: Բավարար է նաև այն, որ Ջհանգիրյանը ՀՀԿ թեկնածուի մասին խոսելիս, կարելի է ասել գովեց, հանրապետականներից ավելի լավ պատճառ բերեց՝ հայտարարելով, որ Արման Թաթոյանը որևէ բացասական դերակատարում չի ունեցել Մարտի 1-ի իրադարձությունների գործում, ընդհակառակը՝ մասնակցել ՄԻՊ զեկույցի կազմմանը Մարտի մեկի գործով:

Փոստանջյանն էլ անդրդառնալով Ջհանգիրյանի քայլերին, նշել էր, որ դասալիքներ միշտ լինում են: Ըստ նրա՝ եթե Ջհանգիրյանին դուր է եկել Մարտի 1-ի իրադարձությունների մասով ՄԻՊ պաշտպանի կազմած զեկույցը, որին մասնակցություն է ունեցել Արման Թաթոյանը, ապա դրանով Ջհանգիրյանը ընդունում է, որ ինքը քաղբանտարկյալ չէ, այլ սովորական կրիմինալ:

Թեև դաշնակցական Արծվիկ Միանասյանը ևս իր ձայնով ՀՀԿ-ին ծառայություն է մատուցել, առավել շատ քննարկվում է Ջհանագիրյանի արարքը: Գուցե պատճառը նաև այն է, որ իր թեկնածությունը կուսակցությանը չառաջարկեց: Մինչ ՀԱԿ-ի որոշում կայցնելը, ակտիվորեն շրջանառվում էր, որ հաջորդ ՄԻՊ պաշտպանը Գագիկ Ջհանգիրյանն է լինելու և ՀԱԿ-ն իր թեկնածությունն է առաջադրելու, ինչի առնչությամբ ՀԱԿ խմբակցության ղեկավար Լևոն Զուրաբյանն ասել էր, որ իշխանությունները մուտիլովկա են անում, փորձում են ՀԱԿ-ին վարկաբեկել: