Շուշան Պետրոսյանի էթիկայի հարցը առկախված է

Էթիկայի հանձնաժողովում, այսօր քննարկվել է Շուշան Պետրոսյանի դեմ ներկայացված դիմումը, սակայն որոշում չի կայացվել: Էթիկայի հանձնաժողով դիմում էր ներկայացրել Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը:

Դիմումի համար պատճառ էր հանդիսացել Շուշան Պետրոսյանի ֆեյսբուքյան գրառումն ուղղված ֆեյսբուքյան օգտատեր Գայանե Շահինյանին: Պատգամավորը գրել էր. «Չհամարձակվես գարշելի երախդ բացել ու նման էժան ու հավուղեղ մակարդակի արտահայտվել երկրիս, մեր բանակի, մեր Պաշտպանության նախարարի մասին, ուշադիր լսի, աչքերդ կհանեմ ու ոնց ուզում ես արձագանքի, լակոտ»:

Newsperss.am-ի հետ զրույցում ԱԺ Էթիկայի հանձնաժողովի նախագահ ՀՀԿ պատգամավոր Խոսրով Հարությունյանը նշեց, որ դեռ որոշում չի կայցավել, քանի որ հարցի քննարկումը դեռ շարունակելու է: Նա հորդորեց սպասել մինչ փետրվարի տասնութը: Պատգամավորը նաև ասաց, որ այդ թեմայի վերաբերյալ չի կարող մանրամասն խոսել, դա բխում է համապատասխան ընթացակարգից:

Գուցե Խոսրով Հարությունյանը չի ցանականում թեմայի մասին մանրամասն խոսել, որովհետև խոսքը հանրապետական գործընկերոջն է վերաբերում:

Թեմայի վերաբերյալ խոսելու ցանկություն չուներ նաև Շուշան Պետրոսյանը: Նշենք նաև, որ Շուշան Պետրոսյանը դեպքից հետո բազմաթիվ անգամ ասել էր, որ չի զղջում իր ասածների համար, էթիկայի խախտում թուլ չի տվել. «բա ինչ անվանեի, պատանյակ, սկզբում նրան դիմեցի՝ «աղջիկ ջան», «բալիկ ջան», բայց գնալով արդեն ավելի թեժացավ այդ ամենը…Հայ իրականության մեջ ես առաջինը չեմ, ով օգտագործում է «աչքերդ կհանեմ» արտահայտությունը»: