Ով կնշանակվի Լոռու մարզպետի պաշտոնում. անուններ են շրջանառվում

Նիկոլ Փաշինյանը հունվարի 3–ին Լոռու մարզ կատարած այցից հետո, «բացահայտումներ» է արել ու իր համար «պարզել», որ մարզը ձեռքից գնում է, կառավարության ֆինանսավորումներն էլ նպատակին չեն ծառայում։

Ու այդ էր պատճառը, որ Երևան վերադառնալով, Փաշինյանն առաջին գործով պաշտոնից ազատեց Լոռու մարզպետ Արամ Խաչատրյանին և Քաղաքաշինության կոմիտեի նախագահ Արմեն Ղուլարյանին։

Այս պահից հետո սկսեցին շրջանառվել թեկնածուների անուններ, ովքեր, իբր թե, հնարավոր է զբաղեցնեն Լոռու մարզպետի պաշտոնը։

Առայժմ, ըստ մեզ հասած տեղեկությունների, թեկնածուները 3 են։ 

Նրանցից մեկը և ամենահավանական թեկնածուն ԱԺ «Քաղաքացիական պայմանագիր» խմբակցության պատգամավոր Արեն Մկրտչյանն է։ Նա վերջերս Ալավերդիում տեղի ունեցած ընտրություններից հետո ընկել էր անախորժ պատմության մեջ։

Ըստ լուրերի, ՔՊ-ական պատգամավորը, ընտրությունների ժամանակ «իրեն վատ պահելու համար» տարածքի «խորոշիների» կողմից ծեծի էր ենթարկվել։

Ըստ որոշ լուրերի էլ, Նիկոլ Փաշինյանի այցը Լոռու մարզ նաև այս հարցի շուրջ որոշ հանգամանքեր պարզելու նպատակով է եղել։

Իսկ քանի որ Մկրտչյանը Ալավերդու աթոռակռվի ժամանակ «դոշ էր տալիս» իշխանության թեկնածուի համար, ուստի, ըստ լուրերի, հնավոր է, որ հենց նրան էլ բաժին հասնի մարզպետի պաշտոնը որպես «պարգևատում»`  հավատարմության ու նվիրվածության համար և որպես «փոխհատուցում» կերած ծեծի դիմաց։

Հաջորդ թեկնածուն, ում անունը շրջանառվում է` «Վանաձորի բժշկական կենտրոն» ՓԲԸ տնօրեն Վահագն Մկրտչյանն է։ NEWSPRESS.am-ը մի առիթով անդրադարձել է այս անձի շուրջ տեղի ունեցող ակմակահարույց իրադարձություններին.  (ներկայացրել էինք, թե ինչպես է նա շարաշահում իր դիրքը):

Երրորդ անձը, ում մասին այսօր խոսվում է` Ոստիկանության գնդապետ Արամ Ղազարյանն է, ով դեռ 2019 թվականին ազատվել է ոստիկանության Գեղարքունիքի մարզային վարչության պետի պաշտոնից և ուղարկվել ոստիկանության կադրերի ռեզերվ։

Իսկ թե ինչ կլինի պաշտոնանկ արված մարզպետի հետ` այս մասին դեռ վաղ է խոսել։ Թեև խոսակցություններ կան, որ Փաշինյանը նրան հնարավոր է տեղավորի մաքսակետի պետի կամ տեղակալի պաշտոնում, սակայն չի բառացվում, որ Խաչատրյանն ինքն է իր թիմի միջոցով դաշտ նետել այս տեղեկատվությունը, որպեսզի հետո չմտածեն, թե իրեն փալասի նման դեն են շպրտել, այլ ասի, թե` պաշտոն էին առաջարկում, բայց ինքը չուզեց։

Արմինե Մկրտումյան