Փորձեք անարցունք դիմավորել Նոր տարին, եթե իհարկե կարող եք... խոհեմություն բոլորիս

Սիրելի հայրենակիցներ, ընթերցողներ, գործընկերներ, մեր հայ ժողովուրդ...

Հայ ազգի համար ծանր էր նախորդ 5 տարին.  պանդեմիա, պատերազմ, մարդկային ու տարածքային մեծ կորուստներ` անդառնալի հետևանքներով: Իսկ այս Նոր տարվա նախաշեմին էլ թշնամուն սկուտեղի վրա մատուցվեց Արցախը` Հայաստանի ողնաշարը...

Ինչո՞ւ այդպես ստացվեց.

–այս հարցը հնչեցնում են բոլորը, հասկանում շատերը, բայց զրո քայլ՝ մեղավորներին պատժելու, իրավիճակը շտկելու և հետագա, արդեն Հայաստանի տարածքների հետ կապված հնարավոր կորուստները կասեցնելու ուղղությամբ...

Այս ֆոնին դժվար է ակնկալել բարեմաղթություն, հաջողություն, երջանկություն, ձեռքբերումներ, բայց պետք է հավատալ՝ դեռ ամեն ինչ կորած չէ, դեռ հնարավոր է եղածը փրկել...

NEWSPRESS.am կայքի ողջ անձնակազմը՝ հիմնադիր-տնօրեն Արիանա Հովսեփյանի գլխավորությամբ, մաղթում է, որ 2024 թվականը լինի սիրո, հանդուրժողականության, համերաշխության, համբերության, խոհեմության ու միասնության տարի:

Խոհեմություն, լրջմտություն, վճռականություն ու գոնե մի քիչ հայրենասիրություն` մեր երկրի ղեկավարներին։

Լուրջ քայլեր` քաղաքական ընդդիմությանը։

Համբերություն ու հանդուրժողականություն մեր հայ հասարակությանը, Արցախից բռնի տեղահանված մեր քույրերին, եղբայրներին, մայրերին ու հայրերին:

Ցանկանում ենք, որ 2024 թվականը մեր մի պատառ դարձած երկրի համար լինի նվաճումների ու հաջողությունների տարի։ Կարողանանք պահպանել եղածն ու հետ բերել կորցրած հայրենիքը։

Առողջ միտք ու հոգի ենք մաղթում մեր հասարակությանը, որպեսզի կարողանան դիմակայել ցավին, տանջանքներին, չտրվել հուսահատությանն ու նորից ոտքի  կանգնել` վճռական ու միասնական քայլերով...

2023-ն էլ այլևս պատմություն դարձավ՝ դաժան գրառմամբ մի էջ ավելացավ Հայաստանի պատմության մեջ։

Թերթեցինք հայ հասարակության ինքնիշխան պետականության ու արդար երկիր ունենալու երազանքի ևս մեկ էջ։

Թող 2024 թվականը լինի ավելի հաջող մեր պետականության պահպանման ու ոչնչացող արժեհամակարգի վերականգնման համար:

Թող ոչ մի արհավիրք չխաթարի մեր վաղվա սերնդի՝ հայ սերնդի ապագան։

Թող Նոր տարին արգասաբեր լինի ողջ հայության համար, լինեն նրանք թե՛ սփյուռքում, թե՛ Հայաստանում, թե՛ Արցախում։ Թող ի վերջո` բացվեն հայերի համար բոլոր փակ ճանապարհները, դռներն ու հնարավորությունները` ապրելու ազատ, ինքնիշխան ու առանց թուրքի Հայաստանում։

Թող հայությունը չբաժանվի ճակատների, սև ու սպիտակի, չարերի ու բարիների:

Թող առողջանա մեր վիրավոր բանակը ու շարունակի ռազմատենչ շնչով և հայրենասիրությամբ պաշտպանել երկրի սահմանները թշնամուց: Քաջություն, անկոտրուն կամք ու անձնվիրություն զինվորին։

Թող երբեք չթրջվեն մեր հայ զինվորին սպասող մոր ու հոր, քրոջ ու եղբոր, կնոջ ու երեխայի աչքերը...

Գնահատեք, պահպանեք ունեցածն ու մի տվեք թշնամուն... 

Փորձեք անարցունք դիմավորել Նոր տարին, եթե իհարկե կարող եք....

Շնորհավոր թող լինի Ամանորն ու Սուրբ Ծնունդը...