Պուտինի «աջ ձեռքը»․ Wall Street Journal-ը բացահայտել է, թե ով է կազմակերպել Պրիգոժինի սպանությունը

Վագներ մասնավոր ռազմական ընկերության (այսուհետ ՄՌԸ-խմբ․) ղեկավար Եվգենի Պրիգոժինի սպանությունը կազմակերպել է ՌԴ Անվտանգության խորհրդի ղեկավար Նիկոլայ Պատրուշևը։ Այս մասին գրում է The Wall Street Journal-ը՝ վկայակոչելով ռուսական և արևմտյան հետախուզական ծառայությունների աղբյուրները։

Հրատարակության տվյալներով՝ Պատրուշևը դեռ 2022 թվականի ամռանը նախազգուշացրել էր Ռուսաստանի նախագահ Վլադիմիր Պուտինին, որ Պրիգոժինի քաղաքական ազդեցությունը, որն առաջացել էր ուկրաինական պատերազմի ժամանակ, ավելի ու ավելի է սպառնում Կրեմլին։ Վագների ռազմական հաջողությունների ֆոնին այս նախազգուշացումն աննկատ մնաց: Սակայն իրավիճակը փոխվեց, երբ Պրիգոժինը զանգահարեց Պուտինին և բողոքեց պաշարների պակասից։ Դեկտեմբերին «պարզ դարձավ, որ Պատրուշևը հաղթել է», գրում է WSJ-ը։

Պուտինն սկսեց անտեսել Պրիգոժինին, և հունիսի սկզբին Կրեմլը փաստացի հայտարարեց Վագներ ՄՌԸ-ն ռուսական մարտական ​​ուժերից հեռացնելու ծրագրերի մասին:

Հունիսին, Պրիգոժինի ապստամբության սկսվելուց հետո, Պատրուշևը վերահսկողության տակ առավ իրավիճակը։ Նա սկսեց սպաների կանչել Վագներ ՄՌԸ-ի ղեկավարի համախոհներից՝ համոզելու նրան դադարեցնել ապստամբությունը։ Պատրուշևը կապ հաստատեց նաև Ղազախստանի և Բելառուսի իշխանությունների հետ։

Անվտանգության խորհրդի ղեկավարը հույս ուներ, որ Ղազախստանը, որին Ռուսաստանն օգնեց ցրել բողոքի ցույցերը 2022 թվականի հունվարին, պատասխան ծառայություն կմատուցի, սակայն նախագահ Կասիմ-Ժոմարտ Տոկաևը մերժեց։ Պրիգոժնի հետ բանակցություններ վարելուն համաձայնեց Բելառուսի նախագահ Ալեքսանդր Լուկաշենկոն։

Օգոստոսի սկզբին, ապստամբության ավարտից ավելի քան մեկ ամիս անց, Պատրուշևը հրամայեց իր օգնականին մշակել Պրիգոժինին սպանելու ծրագիր, WSJ-ին հայտնել է ռուսական հետախուզության աղբյուրը: Ավելի ուշ այդ մասին հայտնել են Պուտինին, և նա չի առարկել։

Արդյունքում, երբ Պրիգոժինը Մոսկվայի օդանավակայանում սպասում էր ինքնաթիռ նստելուն, նրա բիզնես-ջեթի թևի տակ ռումբ դրվեց։ Երբ նավը օդ բարձրացավ, այն պայթեց։

Պրիգոժինի ինքնաթիռը կործանվեց օգոստոսի 23-ի երեկոյան՝ ապստամբությունից ուղիղ երկու ամիս անց։ Ինքնաթիռում եղել է 10 մարդ, այդ թվում՝ Վագների ՄՌԸ-ի հրամանատար Դմիտրի Ուտկինը։ Նրանք բոլորը մահացել են։ Օգոստոսի 27-ին Քննչական կոմիտեն հաստատել է Պրիգոժինի մահը, իսկ երկու օր անց նրան թաղել են Սանկտ Պետերբուրգի Պորոխովսկոյե գերեզմանատանը հոր կողքին։ Օգոստոսի վերջին նախագահի մամուլի քարտուղար Դմիտրի Պեսկովը հայտնել էր, որ ինքնաթիռի կործանման վարկածների թվում դիտարկվում է նաև «կանխամտածված չարագործությունը»։