Ով ես, թե չունես Հայրենիք․ Շուշիի Առանձնակի գումարտակի գրոհայինների հրամանատարը կդառնար 56 տարեկան

Այսօր Շուշիի Առանձնակի գումարտակի գրոհային դասակի հրամանատար Արթուր Ղարիբյանը կդառնար 56 տարեկան:

«Ո՞վ ես դու, մա՛րդ, թե չունես Հայրենիք.
Փուչ արարած:
Ո՞վ ես դու, մա՛րդ, թե պայքար չունես.
Խեղճ արարած:
Ելի՛ր, ժամն է հրաժեշտի,
Ելի՛ր, քանի կարող ես հասցնել,
Եկել է ժամը, պիտի բաժանվենք,
Պիտի հիշենք անցածը,

Սեղմի՛ր ձեռքս, բարեկա՛մ,
Միգուցե վերջին անգամ…»

Արթուր Ղարիբյան

1988 թվականից Արթուր Ղարիբյանը մասնակցել է ՀՀ սահմանամերձ շրջանների, Արցախի Շահումյանի շրջանի, Գետաշենի, Մարտունաշենի ինքնապաշտպանական մարտերին, Շուշիի, Կրկժանի, Մարտակերտի ազատագրմանը, Մալիբեյլիի, Լեսնոյի, Խոջալուի, Լաչինի ռազմական գործողություններին։

Զոհվեց 1992 թվականի նոյեմբերի 6-ին՝ Արցախի Մարտակերտի շրջանի Սրխավենդ գյուղի համար մղված ինքնապաշտպանության մարտի ժամանակ՝ ականի պայթյունից։ Այդ օրը շատ տխուր է եղել, չի խոսել։ Չորս փամփուշտ է ցույց տվել, ասել է. «Էս մեկը Դուշմանինն է, մեկը՝ Ուզբեկինը, մյուսը՝ Վարդան Բախշյանինը, չորրորդն էլ իմն է»։

Ա. Ղարիբյանի անունով անվանակոչվել են Ստեփանավանի արվեստի թիվ 1 դպրոցը, ԼՂՀ Մարտակերտ քաղաքի արվեստի ստուդիան, Ախալքալաքի շրջանի Կուլիկամ գյուղի միջնակարգ դպրոցը։ Երևանում գործում է Ա. Ղարիբյանի անվան թանգարան-ցուցասրահ (Կոմիտասի պողոտա 47 հասցեում)։ Նշենք, որ Արթուրը հենց ինքն էլ արվեստագետ զինվոր է եղել։ Սովորում էր Երևանի գեղարվեստաթատերական ինստիտուտի կերպարվեստի բաժնում, երբ սկսվեց Արցախի պատերազմը։ Սրխավենդ գյուղի համար մղած ինքնապաշտպանության մարտում նա իր վերջին կռիվը տվեց։ 

Շուշիի առանձնակի գումարտակը ստեղծվել է 1 Նոյեմբեր 1992 թվականին Գետաշեն- Շահումյանի կռիվների բովով անցած հերոս ջոկատների հենքի վրա:  

Անպարտելի գումարտակը կռվել է շուրջ 700 ազատամարտիկ, հերոսներ Դուշման Վարդանը, Բեկոր Աշոտը (Աշոտ Ղուլյան), Կարոտ Մկրտչյանը, Հրաչ Գասպարյանը (Ագնեվոյ), Բուժականցի Մուրադը, Արթուր Ղարիբյանը։ 

Այն մեծ համբավ է վայելել տարածաշրջանում իր անպարտելիությամբ ու մարտունակությամբ: Սա այն գումարտակն է, որը 1994-ին Վարանդայի(Ֆիզուլու) ճակատում կատաղի մարտեր մղելով, չնահանջելով անսասան է պահել դիրքերն ու ադրբեջանցիներին ստիպել է դադարեցնել գրոհը: 

Արթուր Ղարիբյանը հետմահու պարգևատրվել է ԼՂՀ «Մարտական խաչ» 1-ին աստիճանի, ՀՀ «Մարտական խաչ» 2-րդ աստիճանի շքանշաններով և «Շուշիի ազատագրման» մեդալով:

Ղարիբյանի աճյունը ամփոփված է Եռաբլուրում` իր ընկեր և հրամանատար Դուշման Վարդանի կողքին: