Մեծ Մասրիկի դպրոցում ԼՂ-ից բռնի տեղահանված սովորողներ կա՞ն․ նախարարի հարցը՝ աշակերտներին

Գեղարքունիքի մարզի Մեծ Մասրիկի միջնակարգ դպրոցի 7ա դասարանի աշակերտները «Արցախից բռնի տեղահանվածները Մեծ Մասրիկում» նախագծային աշխատանքի (առարկան՝ «Հայոց պատմություն») շրջանակում հարցազրույց են վերցրել ԿԳՄՍ նախարար Ժաննա Անդրեասյանից: Հանդիպումը տեղի է ունեցել առցանց ձևաչափով: Հայտնում են ԿԳՄՍ նախարարությունից։ 

Ըստ աշակերտների՝ նախագծի նպատակն է հավաքել Մեծ Մասրիկ համայնքում բռնի տեղահանված հայրենակիցների վերաբերյալ տեղեկություններ, ուսումնասիրել, վերլուծել և այդպիսով նաև բարձրացնել իրենց ինքնակրթության մակարդակը:

Աշակերտների տեղեկացմամբ խումբը բաժանվել է երկու մասի՝ հետազոտողներ և լրագրողներ, և վերջիններս նախագծի շրջանակում հետաքրքրվել են ԿԳՄՍ նախարարից՝ ինչ ծրագրեր են իրականացվում՝ աջակցելու արցախցի հայրենակիցներին:

Նախարար Ժաննա Անդրեասյանը ողջունել է աշակերտներին և նրանց նախաձեռնությունը, որն իրականացվում է հանրակրթական նոր չափորոշչի շրջանակում՝ որպես մեծ թիմով նախագծեր անելու և կարևոր արժեքների մասին դասեր սերտելու հնարավորություն:

Անդրադառնալով Լեռնային Ղարաբաղից բռնի տեղահանված հայրենակիցների կրթության աջակցման ծրագրերին՝ նախարարը նշել է. «Մեր հայրենակիցները աջակցության կարիք ունեն, և պետությունն այդ ուղղությամբ բազմաթիվ ծրագրեր է իրականացնում:

Ամենակարևորը սովորողների կրթության իրավունքի ապահովումն է, որը պետք է կազմակերպվի օր առաջ: 17000-ից ավելի աշակերտ այսօր սովորում է ՀՀ դպրոցներում, ընդհանուր առմամբ 400 ուսուցիչ աշխատում է համակարգում: Մեր բոլոր ջանքերը պետք է ուղղենք աջակցության այլ ծրագրերի իրականացման համար ևս»:

Նախարարը շնորհակալություն է հայտնել բոլոր աշակերտներին արցախցի հայրենակիցներին ջերմորեն ընդունելու, դասերը լրացնելու հարցում օգնելու, նոր պարագաներ տրամադրելու և ցուցաբերած հոգատարության համար:

«Դժվար օրերը մեզ սովորեցնում են ամենակարևոր արժեքները՝ ծանր պահին հասնել միմյանց, օգնել, թեթևացնել մեկս մյուսի բեռը: Այդ որակները հնարավորություն են տալիս ավելի լավ հասարակություն կառուցել,- ասել է նախարարը և պատմել Գորիս այցի շրջանակում երիտասարդների ու պատանիների տպավորությունների մասին,-Գորիսում ձեր հասակակիցները առաջինն են դիմավորել մեր հայրենակիցներին: Նրանք ահռելի աշխատանք են կատարել, և ինչպես պատմում էին՝ մեծ փորձ են ձեռք բերել, և այդ օրերին մարդկային արժեքների մասին ավելի մեծ դասեր են քաղել, քան երբևէ»:

Ժաննա Անդրեասյանը հետաքրքրվել է՝ արդյոք Մեծ Մասրիկի միջնակարգ դպրոցում կա՞ն Լեռնային Ղարաբաղից բռնի տեղահանված սովորողներ: Ըստ մեծմասրիկցի աշակերտների՝ իրենց դպրոցում 2020 և 2023 թվականների պատերազմներից հետո սովորում են շուրջ 40 արցախցի աշակերտ, և ընդհանուր առմամբ Լեռնային Ղարաբաղից 150 մարդ է բնակվում Մեծ Մասրիկում: Նրանք տեղեկացրել են, որ ունեցել են տարաբնույթ հանդիպումներ և պատրաստել են արցախցիների մասին իրազեկող պաստառ և թռուցիկներ:

Նախագծային խմբի ղեկավար ուսուցչի խոսքով՝ աշխատանքի վերջնարդյունքը աշակերտների համար պետք է լինի Արցախի բարբառի, մշակույթի, ավանդույթների, խոհանոցի բացահայտումը, որոնք այժմ ուսումնասիրման փուլում են: Նա նաև նշել է, որ դպրոցում ձևավորվել է արցախցի ծնողների հետ կայուն և լավ համագործակցային մթնոլորտ՝ լիարժեք և ամբողջապես իրացնելու աշակերտների կրթության իրավունքը:

Հանդիպման ավարտին աշակերտները խոստացել են նախագծային աշխատանքն ավարտելուց հետո ամփոփիչ սահիկաշարը ներկայացնել նախարարին: