Որևէ մեկի հայտարարությամբ չի կարող Լեռնային Ղարաբաղի Հանրապետությունը լուծարվել. Սերժ Սարգսյան

Ոչինչ չի լուծարվել` մեկ և երկրորդ` այս իշխանություններից ամեն ինչ էլ սպասելի է: Ի՞նչ է նշանակում լուծարում են, ենթադրենք` լուծարում են, իրենք հո հավերժ չեն լինելու: Այս մասին այսօր լրագրողների հետ զրույցում ասաց ՀՀ երրորդ նախագահ Սերժ Սարգսյանը` պատասխանելով Արցախը և Արցախի պետական ինստիտուտները լուծարելու մասին հայտարարություններին: 

«Դա նաև, բնականաբար, շատ կախված է մարդկանցից, ովքեր բռնի տեղափոխվել են Հայաստանի Հանրապետություն: Եթե նրանք ցանկություն չունենան, ապա ոչ մի բան էլ հնարավոր չի լինելու անել»,- ասաց Սարգսյանը: 

Նրա խոսքով` Արցախի նախագահ Սամվել Շահրամանյանի` Արցախը լուծարելու մասին հայտարարությունը ոչինչ չի նշանակում. «Այսինքն` որևէ մեկի հայտարարությամբ կարող է Հայաստանի Հանրապետությունը լուծարվե՞լ, որևէ մեկի հայտարարությամբ չի կարող Լեռնային Ղարաբաղի Հանրապետությունը լուծարվել»: 

Նա ասաց, որ չի անդրադառնում «խաղաղության պայմանագրին», քանի որ չգիտի, թե այդ պայմանագրում ինչ կա գրված:

«Որևէ մեկդ տեղյա՞կ եք` այնտեղ ինչ է գրված: Ես որևէ հստակ հայտարարություն չեմ լսել: Պայմանագիրը փաստաթուղթ է, որ հնարավոր է հիմնված լինի որոշակի սկզբունքների վրա, բայց պայմանագիրը փաստաթուղթ է, որ պետք է ուսումնասիրել, հասկանալ, տեսնել: Եթե ես այդ փաստաթուղթը չեմ տեսել, ես ինչպե՞ս մեկնաբանեմ այդ փաստաթուղթը: Դա այս իշխանությունների` Հայաստանի կառավարիչների գործելաոճն է: Դուք հիշո՞ւմ եք արդյոք որևէ լուրջ պայմանագիր, որը Հայաստանի Հանրապետության կողմից մինչև 2018 թվականը ստորագրվել է և ստորագրվել է գաղտնի: Չի եղել, չէ՞, այդպիսի բան, հայ-թուրքական հարաբերությունների մասին փաստաթղթերը հրապարակվել են նախօրոք, Լեռնային Ղարաբաղի խնդրի շուրջ բանակցային փաստաթղթերին բոլորդ տեղյակ եք եղել: Էս մարդիկ չեն ուզում, որ հանրությունը տեղյակ լինի»,- ասաց Սարգսյանը: