Արտահերթ ընտրությունները «ֆեյք օրակարգ» է, բայց այն, որ ընդդիմությունը մեզ համար նվեր է, դա միանշանակ. Վաղարշակ Հակոբյան

«ԵԱՏՄ անդամակցությունն այլընտրանք չունի մեզ համար, բավական դրական բաներ է բերում մեր երկրին»։ Այս մասին այսօր լրագրողների հետ զրույցում ասաց ԱԺ ՔՊ-ական պատգամավոր Վաղարշակ Հակոբյանը՝ անդրադառնալով ՀԱՊԿ միջոցառումներին Հայաստանի չմասնակցելու հետ կապված հարցին։

Նա նշեց, որ ՀԱՊԿ-ի նիստերին Հայաստանի չմասնակցելը մեկնաբանվել է ինչպես հրապարակային, այնպես էլ աշխատանքային մակարդակում։

«Հայաստանը բոլոր մակարդակներում խոսում է շատ ուղիղ և խոսում է ՀՀ պետական շահին համապատասխան»,-ասաց նա։

Լրագրողների դիտարկմանը՝ կապված  իշխանության կողմից հնարավոր արտահերթ ընտրություններ անցկացնելու նախապատրաստական աշխատանքների հետ, Վաղարշակ Հաոբյանը նկատեց, որ նման բան չկա։

«Դա «ֆեյք օրակարգ» է, բամբասանք, նման բան չկա ու դրա կարիքն էլ չկա»,-ասաց պատգամավորը։

Նա անգամ նշեց, որ հենց այս պահին էլ, կողքի սենյակում,  ակտիվ ու կառուցողական աշխատում են ընդդիմության հետ։

«Վերջիվերջո, մեզ հաջողվեց ընդդիմությանը բերել աշխատանքային կառուցողական դաշտ: Միգուցե նրանք եկան, չեմ կարող հստակ գնահատել չափաբաժինները՝ նրա՞նք եկան, թե՞ իրենք բերեցին, բայց հիմա աշխատում ենք»,- ասաց նա։

Դիտարկումը, թե՝ այս իշխանությունն ու ընդդիմությունը նվեր են իրար համար, ուրախացրեց իշխանական մեծամասնությունը ներկայացնող պատգամավորին։

Երբ լրագրողը այդ երկու կողմերին փորձեց նկարագրել մեկ նախադասությամբ՝ ասելով, թե՝ կողմերը «Կարգին հաղորդումն»  են հիշեցնում, երբ այնտեղ ասվում է՝ երկուսդ էլ ճիշտ եք՝ Վաղարշակ Հակոբյանը ընդատեց նրան․

«Կարելի՞ է Ձեզ ընդհատել․ ես չգիտեմ` իշխանությունն ընդդիմության համար ինչքանով է նվեր, բայց որ ընդդիմությունը մեզ համար նվեր է, դա միանշանակ համաձայն եմ»,- ասաց պատգամավորը։