Արայիկ Հարությունյանն այսօր Ադրբեջանի բանտում է, որովհետև ինքը շատ ավելի բան գիտի․ Արթուր Խաչատրյան

Արցախցիներից որևէ մեկը Արայիկ Հարութունյանին չի պարտադրել հրաժարական տալ: 

Այս մասին ԱԺ-ում լրագրողների հետ զրույցում ասաց «Հայաստան» խմբակցության պատգամավոր Արթուր Խաչատրյանը՝ անդրադառնալով ՔՊ խմբակցության պատգամավոր Գևորգ Պապոյանի այն հայտարարությանը, թե իր անձնական թշնամիներն են բոլոր այն մարդիկ, որոնք ասում են՝ Արցախի Հանրապետության պետական ինստիտուտները պետք է գործեն ՀՀ տարածքում, քանի որ դրանով առիթ են տալիս Ադրբեջանին խաղաղության պայմանագիրը չստորագրելու։

«Ամեն մարդ ինքն է իր անձնական թշնամիներին ընտրում: Ես այն մեկն եմ, որը համարում է, որ Արցախի իշխանությունները պետք է գործեն, Արցախի Հանրապետության ժողովուրդը պետք է ունենա լիազոր ներկայացուցիչ, քանի որ մեր քաղաքական ուժը և մեր հայրենակիցների մի ստվար զանգված, եթե ոչ բացարձակ մեծամասնությունը համարում է, որ Արցախի Հանրապետության էջը փակված չէ: Ինչպե՞ս ենք պատկերացնում հետամուտ լինել խնդրին՝ առանց Արցախի ժողովրդի իրավազոր ներկայացուցիչների առկայության, առանց այդ ինստիտուտների կենսագործության»,- ասաց ընդդիմադիր պատգամավորը։

Ինչ վերաբերում է Արայիկ Հարությունյանին, ապա ըստ Արթուր Խաչատրյանի, Արայիկ Հարությունյանն այսօր Ադրբեջանի բանտում է, քանի որ, նա շատ ավելի շատ բան գիտի և կարող է պատմել, քան թե այսօրվա իշխանությունները կցանկանային լսել:

«Խոսքը վերաբերում է նաև մյուս նախագահներին, տեսեք` Ադրբեջանի բանտում գտնվում են Փաշինյանի քաղաքական բոլոր հակառակորդները»,- ասաց պատգամավորը: