Հետևողականորեն ավտոներկրողների կյանքը բարդացնում եք․ բա եթե Գյումրու մաքսայինում հերթ չկա, ինչի՞ եք «ստայանկի» գինը 1600-ից բարձրացնում 5000 դրամի. Թադևոս Ավետիսյան

Ուզում եմ հասկանալ` ի՞նչ եք քննարկում, որովհետև եկել եք, նույն բանն եք կրկնում։ Այս մասին ԱԺ նիստի ժամանակ հայտարարեց «Հայաստան» խմբակցության պատգամավոր Թադևոս Ավետիսյանը՝ «Պետական տուրքի մասին» օրենքի փոփոխությունների նախագծի քննարկման ժամանակ։

«Պետք է արձանագրել, որ դուք հետևողականորեն ավտոներկրողների կյանքը բարդացնում, դժվարացնում եք, էդ դուք կիմանաք՝ ինչի եք տենց անում»,-ասաց պատգամավորը։

Նա նկատեց, որ կայանատեղիում կանգնեցնելու համար մեկ օրվա համար նախատեսված 1600 դրամը 5000 դրամ դարձնելը խնդիրը չի լուծում։

«Ընդհակառակը` ավելի խորանալու և լրջանալու է, որովհետև, եթե ինքն իրավունք ունի 4 ամիս մեքենան այդտեղ թողնելու, էդ փողը բարձրացնելով այդ հարցը չի լուծվի: Եվ երկրորդ՝ ասացիք, որ թացը խառնվում է չորին։ Օբյեկտիվ խնդիրներ կան, երբ մարդը, ասենք, վին կոդը ճշտելու համար տարբեր օբյեկտիվ անհրաժեշտությունից ելնելով` մի քանի օր մեքենաները ստիպված թողնում է ձեզ մոտ: Հաջորդը, ձեզ մոտ հերթեր են գոյանում, դուք չեք կարողանում ժամանակին սպասարկել: Այսինքն` դուք ձեր գործը լավ չեք անում, ավտոներկրողը պետք է ձեր գործը վատ անելու համար տանի օրական 5000 դրամ տա, մինչև ձեր հերթերը կարգավորվի», ասաց ընդդիմադիր պատգամավորը:

ԱԺ նախագահ Ալեն Սիմոնյանը միջամտեց․ «Եկեք մենք մեր գործը լավ անենք, ժամանակը չչարաշահենք»:

Պատգամավորին արձագանքելով՝ ՊԵԿ նախագահի տեղակալն էլ նշեց, որ իրենք այսօր ի վիճակի են Գյումրու մաքսակետում սպասարկել 500 մեքենա. «Մենք սպասարկում ենք այդ մեքենաներին, հերթեր կանգնած չեն: Որևէ մեքենա այնտեղ չի սպասել, որ մնա հաջորդ օրվան»:

Թադևոս Ավետիսյանը պնդեց, որ ինքն իր աչքով է տեսել այդ հերթերը և իրեն այդ մասին ավտոներկրողներն են ահազանգել։ Պատգամավորը նկատեց, որ եթե իսկապես հերթեր չկան, ապա գնի փոփոխություն առավել ևս տեղին չէ։

«Բա եթե հերթեր չկան, ամեն ինչ նորմալ է, պետությունն էլ տուրք է ստանում 1600 դրամ, բա էլ ինչո՞ւ եք բարձրացնում, որ ի՞նչ խնդիր լուծեք: Որտե՞ղ կա օրական 1600 դրամով «ստայանկա», էն էլ Գյումրիի էդ տարածքում, որ դուք մտածում եք, թե մարդիկ մեքենան էդտեղ թողնում են կայանելու համար»,- ասաց նա։

Նա նաև հիշեցրեց, որ կար առաջարկ՝ ոչ թե մեկ, այլ գոնե 5-7 օր լինի անվճար կայանելը, որպեսզի տարանջատում լինի։