«Արի, արի, մի վախենա»․ «Ես հեռու չեմ»․ ՇՄ նախարար Սիմիդյանը խուսափեց մոտենալ բողոքի ակցիա անող ձկնաբույծներին (տեսանյութ)

Ձկնաբույծներն այսօր՝ դեկտեմբերի 11-ին, վաղ առավոտից հավաքվել են կառավարության 3-րդ մասնաշենքի դիմաց և բողոքի ակցիա են անում: 

Ըստ նրանց՝ պատճառը 2-3 շաբաթ առաջ ԱԺ-ում ընդունված օրենքներից մեկն է ձկնաբուծական տնտեսությունների վերաբերյալ։ Շրջակա միջավայրի նախարար Հակոբ Սիմիդյանը հայտարարել է, որ նման համակարգերը պետք է թույլ տան վերաօգտագործել ջրի առնվազն 40 տոկոսը: Երբ վերջինս մտնում էր նախարարության շենք, հավաքված ձկնաբույծները փորձեցին մոտենալ նրան, սակայն ոստիկանական պատն արգելք հանդիսացավ։ Այդ ժամանակ հավաքվածները Սիմիդյանին առաջարկեցին իրենց մոտենալ։

«Պարո'ն Սիմիդյան, մոտեցեք մեզ»,- ձայն տվեցին նրանք։ 

Բայց նախարարը խուսափեց մոտենալուց ու մուտքի աստիճաններից բղավեց․ «Ես հեռու չեմ»,- ասաց նա՝ տեղեկացնելով, որ հանդիպում կլինի։

Ձկնաբույծները հեռվից պարզ չէին հասկանում, թե ինչ է ասում նա։ Այդ ժամանակ հավաքվածներից մեկը, դիմելով նախարարին, ասաց․ «Արի, արի, մի վախենա»։

Հիշեցնենք, որ ԱԺ-ում նոյեմբերի 22-ին երկրորդ և վերջնական ընթերցմամբ ընդունվել է ջրային օրենսգրքում փոփոխությունների նախագիծը, ըստ որի՝ Հայաստանի ձկնաբուծական տնտեսությունները, որոնք ջուր են ստանում ստորգետնյա հորատանցքերից, պետք է օգտագործեն միայն ջրի շրջանառության խնայող համակարգեր։