ՔՊ-ական իշխանությունը որդեգրել է «թքած՝ քաղաքացին ում է ընտրել, իշխանությունը մենք կվերցնենք» ոճը․ Դավիթ Մարգարյան

«Ապրելու երկիր» կուսակցության ավագանու անդամ Դավիթ Մարգարյանը ֆեյսբուքյան իր էջում անդրադարձել է Ալավերդու համայնքապետին պաշտոնանկ անելու «ՔՊ» նախաձեռնությանը․ 

«Վրդո, մեզ բաստիոն պետք չի...»

Շատերը, թերևս, հասցրել են այսօր տեղեկանալ, որ Ալավերդիում լուսաբացը սովորական չէր։

Սովորական չէր, քանի որ տեղի էր ունենալու մի իրադարձություն, որը անկախ Հայաստանի ողջ պատմության ընթացքում լինելու էր բացառիկ, աննախադեպ, չլսված ու չտեսնված։ Ու ինչքան էլ թվա, թե խոսքը կարող էր ինչ-որ դրական ու հույս ներշնչող բանի մասին լինել, սակայն իրականությունը շատ ավելի մռայլ էր, դժգույն ու դժբախտ։

Ալավերդի համայնքում տեղի ունեցավ մի իրադարձություն, որը կարելի է նկարագրել որպես բռնի իշխանափոխություն, համայնքի բնակչի կողմից արդար և ազատ ընտրությունների արդյունքում ձևավորված համայնքային իշխանության տապալում՝ պետական ուժային կառույցների ապօրինի գործողություններով ու ԱԺ իշխանական պատգամավորի դիրիժորության բարձր հովանու ներքո։ Այո, այո, դուք չեք սխալվում. այս ամենը ՀՀ Սահմանադրությամբ երաշխավորված տեղական ինքնակառավարման համակարգում, որը, թվում էր՝ անկախ է պետական կառավարումից։

Տարբեր գնահատականներով՝ այսօր առավոտյան Ալավերդի քաղաքում էր մոբիլիզացվել ոստիկանության տարբեր ստորաբաժանումների 800-ից 1000 աշխատակից (սկսած պարեկային ծառայությունից, վերջացրած՝ ոստիկանության սև ու կարմիր բերետավոր զորքերով, այդ թվում՝ Երևանից)։ Եվ այս ամենը տեղում անձամբ համակարգում էր ՀՀ ՆԳՆ ոստիկանության պետի տեղակալը։ Տպավորություն էր, թե ինչ-որ հատուկ հակաահաբեկչական գործողություն էր իրականացվում, բայց առանձնապես պարզ չէր, թե «ահաբեկիչները» ովքեր էին, իսկ վտանգվածները՝ ովքեր։

Հարց կծագի, թե՝ լավ, բա էսքան զորքը ինչի՞ էր հավաքվել։ Պատասխանը մեկն է՝ կենդանի խիտ պատ կազմելով լցնել համայնքապետարանի մուտքը, հարկերը, աստիճանավանդակները և ապահովել Ալավերդի համայնքի ղեկավարին անվստահություն հայտնելու ապօրինի և ոչ լեգիտիմ գործընթացը։ Եվ ամենահետաքրքիրը, որ նույնիսկ համայնքի ղեկավարին և ավագանու ոչ քպ-ական անդամներին չէին թողնում ներս մտնել համայնքապետարան։ Այո, այո, այս անգամ էլ չեք սխալվում. համայնքի գործող ղեկավարին և ավագանու անդամներին թույլ չէին տալիս մտնել իրենց իսկ աշխատավայր։

Սակայն, դրան հակառակ, առավոտյան ժամը 06։00-ից քպ-ական ավագանու անդամները, քպ-ական ԱԺ պատգամավորն ու ոստիկանության մեծաթիվ ծառայողներ առանց խոչընդոտ արդեն իսկ տեղավորվել էին համայնքապետարանում։

Այնուհետ, ոստիկանության և արտակարգ իրավիճակների ծառայության օգնությամբ, կոտրելով ավագանու նիստերի դահլիճի դուռը՝ սկսվեց ու անցկացվեց նիստը՝ ՀՀ օրենսդրության խայտառակ խախտումներով։ Իսկ թե ինչ «օրինակելի» վարք էր ցուցաբերում ոստիկանության աշխատակիցների թիկունքում ապահով հանգրվանած ԱԺ պատգամավորը, սա թերևս առանձին քննարկման առարկա է։ Եվ այո, դուք երրորդ անգամ չեք սխալվում։ Խոսքը Ալավերդի համայնքի ավագանու նիստի մասին է, որի անցկացման «հասարակական կարգը» պաշտպանելու համար մոբիլիզացվել էի մի ամբողջ զորք։ Ի դեպ, ոստիկանությանը նման համեստ խնդրանքով դիմել էին քպ-ականները։

Արդյունքում, չտեսնված զոռբայությամբ ավագանու քպ-ական անդամները՝ ճամբարափոխ հերոսի հետ միասին, իրենք իրենցով համայնքի ղեկավար ընտրեցին։

Այն, որ այս ապօրինությունները իրենց պատասխանը ստանալու են, կասկած չպետք է ունենալ։ Սակայն արդեն փաստ է, որ գործող քպ-ական իշխանությունը որդեգրել է «թքած, թե քաղաքացին ում է ընտրել, վերջում իշխանությունը մենք կվերցնենք» գործելաոճը, և այս ամենը լեգիտիմացվում է բարեփոխված ոստիկանության ապօրինի գործողություններով։

Թերևս Հայաստանում հիմք է դրվում պետական կառավարման շատ յուրօրինակ ձևի, որտեղ ժողովրդավարության կարիք չկա. մենք տեղով մեկ ժողովրդավարության մարմնավորումն ենք, իսկ եթե չեք հավատում՝ ոստիկանությունը կհամոզի ձեզ հակառակում։