Եթե ՔՊ-ն հրաժարվում է կողմ քվեարկել մեր նախագծին, փաստորեն, դեմ է քվեարկում իր կառավարության ծրագրին, և կառավարությունը դառնում է ոչ լեգիտիմ․ Չալաբյան

2021 թվականին, երբ ՔՊ-ն հավաքեց 680 հազար ձայն, մտավ ԱԺ ու կազմեց մեծամասնություն, խոստացան հետամուտ լինել Արցախի ինքնորոշման իրավունքին, երաշխավոր լինել Արցախի և արցախցիների անվտանգությանը։ Այս մասին լրագրողների հետ զրույցում ասաց «ՀայաՔվե» նախաձեռնության համակարգող Ավետիք Չալաբյանը՝ Ազգային ժողովի դիմաց կազմակերպված բողոքի ակցիայի ժամանակ։

Նա նշեց, որ ՔՊ-ն իր բոլոր խոստումները փորձում է մոռացության մատնել։

«Պետք է հիշել, որ դրանք ոչ թե օդում տված խոստումներ են, այլ դրանց հիման վրա ձևավորվել է կառավարության ծրագիր և այն օրենքի ուժ ունի և պարտադիր է կատարման համար։ Դա հենց այս կառավարության ու Նիկոլ Փաշինյանի ծրագիրն է։ Ուստի եթե, ՔՊ-ն այսօր հրաժարվում է կողմ քվեարկել մեր ներկայացրած օրենքի նախագծին, փաստորեն, դեմ է քվեարկում իր կառավարության ծրագրին և դրանով դառնում ապօրինի։ Ստացվում է կառավարությունը դառնում է ոչ լեգիտիմ։ Եվ մեր հաջորդ քայլը պետք է լինի այս կառավարությունից, որն իր ընտրողներին խաբել է, ազատվել»,-ասաց Ավետիք Չալաբյանը։

Նա նշեց, որ եթե ՔՊ-ն դեմ քվեարկի իրենց ներկայացրած նախագծին, ապա դա նշանակում է, որ նա դեմ է քվեարկում կառավարության ծրագրին։

Ճշտող հարցին, թե արդյո՞ք այդ ամենը հիմա արդիական է՝ Չալաբյանը պատասխանեց. ««ՀայաՔվեն» ավելի քան արդիական է։ Արցախի ինքնորոշման իրավունքն առանցքային է պահպանել, որպեսզի երբևիցե կարողանանք Արցախը վերադարձնել»։

Նրա խոսքով` Արցախն օրենքով պատկանում է հայ ժողովրդին։

«Արցախում ապրող մեր հայրենակիցներին։ Եթե այս պահին հանգամանքների բերումով ապրում են Հայաստանում, ամեն ինչ պետք է անել, որպեսզի կարողանան վերադառնան ու վերատիրանալ Արցախին։ «Հայաքվեն» հենց դա է մեզ տալիս»,- ասաց Չալաբյանը։