Ի՞նչ հեռանկար է բացվում հայ-վրացական հարաբերությունների համար

Հայ-վրացական հարաբերությունները, որ ավանդաբար բարիդրացիական են, հնարավոր է մուտք գործեն նոր` ավելի սերտ կապերի մակարդակ, և պատճառը տարածաշրջանային զարգացումներն են` «Ամերիկայի ձայնի» հետ զրույցում նման կարծիք հայտնեցին Երևանից ու Թբիլիսիից։

Հայաստանյան «Օրբելի» կենտրոնի վերլուծաբան, Վրաստանի գծով փորձագետ Ջոնի Մելիքյանն ուշադրություն հրավիրեց՝ 2020 թվականից հետո ոչ միայն նկատելիորեն ակտիվացել են հայ-վրացական միջպետական՝ հատկապես բարձր մակարդակի շփումները, այլև կողմերն անցել են որոշակիորեն նոր խուսույթի` անդրադառնալով երկկողմ հարաբերություններին։

«2020 թվականի պատերազմի արդյունքում ձևավորված այն ստատուս քվոն և այն միջանկյալ շրջանը, որի միջովոմենք այսօր անցնում ենք․․․ ։ Դրանից հետո եղան տարբեր ագրեսիաներ, տարբեր սահմանային վեճեր, և նույնիսկ անցած սեպտեմբերյան ագրեսիան Հայաստանի տարածքային ամբողջականության դեմ, Արցախի վերջին էթնիկ զտումը և բոլոր այս գործընթացները Թբիլիսիի համար ընդունելի չէին, և նաև ցուցիչ էին, որ Ադրբեջանը որակապես փոխվում է և փոխում է իր դիրքերը այս տարածաշրջանում՝ Թուրքիայի աջակցությամբ, և այս խախտված բալանսը Վրաստանի համար բավականին բարդացնում է իր անվտանգային միջավայրը, ինչը նաև մտածելու առիթ է տալիս, որ պետք են բալանսավորված հարաբերություններ՝ նաև այդ դրանից ելնելով, այլ երկների հետ, և այստեղ Հայաստանը, իմ կարծիքով, դիտարկվում է հենց նաև այս տեսանկյունից»,-ասում է Մելիքյանը։

Օրերս` մամլո ասուլիսին անդրադառնալով Վրաստանի հետ հարաբերություններին, վարչապետ Նիկոլ Փաշինյանը հայտարարեց, թե Հայաստանը լիարժեք և միանշանակորեն պաշտպանում է Վրաստանի տարածքային ամբողջականությունը` մանրամասնելով, թե ինչ փոփոխություններ են կրել երկկողմ հարաբերությունները նախորդ տարիներին։