Արցախից բռնի տեղահանված թոշակառուները կստանան նաև հոկտեմբեր և նոյեմբեր ամիսների թոշակները

«Նախագծի նպատակը ԼՂ-ից բռնի տեղահանված քաղաքացիների կենսաթոշակի իրավունքի իրացման ընթացակարգերի հստակեցումն է»։ Կառավարության նիստում հայտարարեց Աշխատանքի և սոցիալական հարցերի նախարարի տեղակալ Դավիթ Խաչատրյանը՝ հիշեցնելով, որ ԱԺ վերջին նիստում ընդունված օրենսդրական փոփոխությամբ այդ լիազորությունը վերապահվել է կառավարությանը:

Նա հայտնեց, որ նախագծով նաև առաջարկվում է սահմանել առանձին ընթացակարգ՝ փախստականի կարգավիճակ ունեցող անձի առանձնացված կենսաթոշակ ստանալու համար, ինչպես նաև կանոնակարգվում է այն վերահաշվարկման համար դիմելու, կենսաթոշակի տեսակը փոխելու, վճարելու և կենսաթոշակի գործ վարելու կարգի առանձնահատկությունները:

«Բռնագաղթած անձը, որի կենսաթոշակի գործն առկա է ԼՂ կենսաթոշակի բազայում, կարող է օրենքով կենսաթոշակ ստանալու համար ներկայացնել առցանց դիմում մինչև 2024 թվականի հունիսի 1-ը»,- ասաց փոխնախարարը և հավելեց, որ դիմումի հետ որևէ փաստաթուղթ չի պահանջվում, բայց այն անձինք, որոնց հաշմանդամության ժամկետը լրացել է և վերջիններս ԼՂ-ում չեն հասցրել անցնել, կամ անցել են, բայց թոշակ ստանալու իրավունքը չի իրացվել, նրանք կներկայացնեն որոշ փաստաթղթեր:

Դավիթ Խաչատրյանը հայտնեց, որ ԼՂ-ում սահմանված աշխատանքային ստաժը պահպանվում է, բայց կենսաթոշակի չափը լինելու է ՀՀ-ում սահմանված չափերով:

Նրա խոսքով՝ բռնագաղթածների կենսաթոշակների ստանալու իրավունքը վերականգնվելու է 2023  թվականի հոկտեմբերի 1-ից: 

Փոխնախարարը նաև հայտարարեց, որ նոր կարգավորմամբ բռնագաղթածների համար առանձին ընթացակարգով կենսաթոշակների նշանակումը կտևի մինչև 2028  դեկտեմբերի 31-ը, և այդ ընթացքում դրանք չեն վերանայվի, այլ այդ օրվանից հետո կվերանայվեն: