Մեր ռուս գործընկերների հետ փորձելու ենք հասկանալ՝ ի՞նչ է փոխվել կարգավորումների մեջ, որն առաջացրել է այսպիսի վիճակագրության փոփոխություն․ Քերոբյանը՝ Լարսի մասին

Անցած տարվա ընթացքում 40-ից պակաս դեպք է տեղի ունեցել, երբ ՌԴ-ի համապատասխան մարմինները ՀՀ-ից արտահանված ապրանքը վերադարձրել են։ Այս մասին ԱԺ տնտեսական հարցերի մշտական հանձնաժողովի նիստում ասաց ՀՀ էկոնոմիկայի նախարար Վահան Քերոբյանը՝ արձագանքելով «Հայաստան» խմբակցության պատգամավոր Թադևոս Ավետիսյանի` Լարսի անցակետում տիրող իրավիճակի հետ կապված դիտարկմանը։

Անդրադառնալով «Ռոսսելխոզնադզոր»-ի հայտարարությանը՝ նախարարը նշեց, որ այս շաբաթ ռուս գործընկերների հետ քննարկում են նախաձեռնել։

«Էկոնոմիկայի նախարարությունը և Եվրասիատնտեսական հանձնաժողովի մեր գործընկերները, ներքին շուկաների պաշտպանության հարցերով նախարար պարոն Սիմոնյանը և մյուս գործընկերները նախաձեռնել ենք քննարկում, որը պետք է տեղի ունենա այս շաբաթվա ընթացքում, որտեղ մեր ռուս գործընկերների հետ փորձելու ենք հասկանալ, թե ի՞նչ է փոխվել կարգավորումների մեջ, որն առաջացրել է այսպիսի վիճակագրության փոփոխություն»,- ասաց Քերոբյանը՝ հավելելով, որ պետությունը չի արտահանող ընկերությունը, պետությունը միջավայր ստեղծողն է։

«Ամեն մի ընկերությունն է որոշում` իր ապրանքը որ երկրի համար է արտադրում և ում է վաճառում»,- ասաց Քերոբյանը։

Նա նշեց՝ «Ռոսսելխոզնադզոր»-ի հրապարակումը և դրա հետ առկա տեղեկատվությունը խորը ուսումնասիրվում է համապատասխան մարմինների կողմից։