Դե, եթե իշխանությանը պետք են արագ վճիռներ՝ եկեք աչք փակենք, արագ սղղցրեք գնա․ Նարեկ Մալյանը՝ դատավորին

Նարեկ Մալյանի գործով դատական նիստի ընթացքում պաշտպաններ Ռուբեն Մելիքյանը և Տիգրան Աթանեսյանը բացարկ հայտնեցին նիստը նախագահող դատավորին։

«Դուք որոշում կայացրիք Նարեկ Մալյանի կալանքը 3 ամսով երկարաձգելու վերաբերյալ։ Երեկ ստացել ենք որոշման գրավոր տարբերակը, որտեղ Դուք նշել եք, թե «անդրադառնալով կալանքի հիմքերին, դատարանը գտնում է, որ տվյալ փուլում շարունակվում է առկա լինել մեղադրյալի նկատմամբ կալանքը որպես խափանման միջոց ընտրելու հիմքերից մեկը։ Մեղադրյալը մնալով ազատության մեջ՝ կարող է կատարել նոր հանցանք»։ Հարգարժա՛ն դատարան, դուք սրանով ընդունում եք, որ Նարեկ Մալյանի՝ այս պահին քննարկվող արարքն արդեն իսկ հանցագործություն է, Դուք գնահատական եք տալիս նրա գրառմանը։ Դուք չեք կարող ընկալվել որպես անկողմնակալ դատարան», - ասաց պաշտպան Ռուբեն Մելիքյանը։

Պաշտպան Տիգրան Աթանեսյանն էլ հայտարարեց, թե դատարանի արտահայտած դիրքորոշումը հստակ խոսում է կանխակալության մասին։

«Նշել եք՝ «նոր հանցանք», այսինքն՝ արդեն իսկ կատարվել է հանցանք և կարող է կատարվել նոր հանցանք։ Մեր պաշտպանյալը նախկինում երբեք դատապարտված չի եղել։ Այստեղ մենք գործ ունենք խոսքի ազատության հետ, որի շուրջ պետք է կատարվի քննություն, բայց արդեն նշել եք՝ «նոր հանցանք»։ Այս պայմաններում մենք հիմնավոր կերպով կասկածում ենք Ձեր կանխակալությանը և Ձեզ բացարկ ենք հայտնում», - ասաց Աթանեսյանը։

Դիմելով նիստը նախագահող դատավոր Սուսաննա Գզոգյանին Նարեկ Մալյանն ասաց․ «Ես հասկանում եմ Ձեր շտապողականությունը։ Դուք անցած նիստին այնքան շտապեցիք, որ նույնիսկ չհարցրեցիք, ես առողջական ինչ-որ խնդիր ունե՞մ, թե՞ ոչ։ Ես հասկանում եմ նաև մեղադրողի հպարտ հայացքը»։

Նրա դիտարկմամբ, իշխանությանը պետք են արագ մեղադրական վճիռներ։

«Ինչ ասեմ, եկեք աչք փակենք, որ ես զրկված եմ եղել իմ իրավունքների իրացումից, սղղցնենք, գնանք, որ հաջորդին էլ դատենք, որ հերթ չլինի։ Հնարավորինս շատ մեղադրական վճիռներ ու կալանքներ, երեկ կարծեմ էդ ցուցումը տրվել էր»,-ասաց Մալյանը։

Նարեկ Մալյանը ևս միացավ պաշպանների միջնորդությանը։  Դատավորը չբավարարեց ինքնաբացարկի միջնորդությունը։