«Հայաքվե»-ն կարող է ամուր հիմք կարող ստեղծել Արցախի վերադարձի հետագա պայքարի համար. Բեգլարյան

Արցախն այժմ կորսված է, բայց ոչ մեկընդմիշտ, և Արցախի վերադարձի ու Արցախ վերադարձի հեռանկարը կախված է հատկապես այս փուլում ինչ ենք անում մենք` հայ ժողովուրդը և հատկապես պաշտոնական Հայաստանի Հանրապետությունը: Այս մասին այսօր «Հայաքվե» նախաձեռնության հրավիրած խորհրդարանական լսումների ժամանակ ասաց Արցախի նախկին ՄԻՊ, նախկին պետնախարար Արտակ Բեգլարյանը: 

«Նվազագույն անելիքը կամուրջները չայրելն է, էլ չասեմ, որ եղած կամուրջներն ամրացնելու և նոր կամուրջներ կառուցելու կարիք կա: «Հայաքվե» նախաձեռնության կողմից առաջարկված այս օրինագիծն իմ կարծիքով կարևոր գաղափարական, իրավական և քաղաքական ամուր հիմք կարող է ստեղծել Արցախի վերադարձի հետագա պայքարի համար»,- ասաց Բեգլարյանը:

Նա առաջարկով դիմեց «Հայաստան» դաշինքի պատգամավոր Արծվիկ Մինասյանին` նրա հայտարարության վերաբերյալ:

«Հատկապես վերջին նախադասությունում, որտեղ գրված է` «դրա հետևանքները վերացնելու ուղղությամբ», «վերացնելու» բառից հետո ավելացնել` «ներառյալ Արցախից բռնի տեղահանված ժողովրդի վերադարձը հայրենիք և այնտեղ ինքնորոշման իրավունքի հիման վրա անվտանգ և արժանապատիվ կյանք ապահովելու ուղղությամբ: Սա շատ կարևոր դրույթ է, որն անպայմանորեն մենք պետք է հաշվի առնենք և դառնա ՀՀ պաշտոնական դիրքորոշումը»,- ընդգծեց Արցախի նախկին պետնախարարը: