ԱՄՆ-ն Հայաստանին որպես տնտեսական օգնություն պետք է տրամադրի 22.412.000 դոլար

ԱՄՆ-ի Հայ դատի հանձնախումբը (ANCA) դիմել է Միացյալ Նահանգների իշխանություններին` պահանջելով ավելացնել Հայաստանին ու Լեռնային Ղարաբաղին տրամադրվող ֆինանսական օգնության չափը, ինչպես նաև ամրապնդել հայ-ամերիկյան առևտրային կապերը:

Ինչպես հայտնում է asbarez.com-ը, ANCA-ի պահանջները ներկայացվել են այն բանից հետո, երբ նախագահ Բարաք Օբաման հրապարակել է 2017թ-ի ֆինանսական տարվա բյուջեի նախագիծը:

Օբամայի առաջարկով՝ Հայաստանին որպես տնտեսական օգնություն պետք է տրամադրվի 22.412.000 դոլար, ինչը 22 տոկոսով բարձր է նախորդ տարվա հատկացումից: Ինչ վերաբերում է հարևան Ադրբեջանին, ապա Միացյալ Նահանգների նախագահն առաջարկել է այդ երկրին տրամադրել 10.936.000 դոլար։

Ռազմական օգնությանը վերաբերող տարատեսակ ծրագրերի շրջանակում Հայաստանին ու Ադրբեջանին առաջարկվել է հատկացնել հավասարաչափ գումար` 1.6 մլն դոլար երկրներից յուրաքանչյուրին:

Բացի այդ, Օբաման առաջարկել է հավելյալ 1.7 մլն դոլար հատկացնել Հայաստանին` թմրանյութերի տարածման դեմ պայաքարի շրջանակում:

Ինչ վերաբերում է Լեռնային Ղարաբաղին տրամադրվելիք ֆինանսական օգնության չափին, ապա ներկայացված փաստաթղթում որևէ հստակ թիվ չի նշվում: Այնուհանդերձ, ANCA-ի գործադիր տնօրեն Արամ Համբարյանը պահանջել է, որ ԼՂՀ-ին ԱՄՆ-ի կողմից տրամադրվի 5 մլն դոլար։

Աղբյուրը նկատում է, որ անցած մի քանի տարիների ընթացքում ԱՄՆ-ն միջինը 1.5 մլն դոլար է հատկացրել ԼՂ-ին:
Բացի այդ, ANCA-ն պահանջում է Հայաստանին տրամադրվելիք տնտեսական օգնության չափը հասցնել 40 մլն դոլարի, ինչպես նաև 10 մլն դոլար հատկացնել Հայաստանում ապաստանած մոտ 20.000 սիրիահայերին օգնելու համար:

Աղբյուրը հավելում է, որ ANCA-ն առաջարկում է Վրաստանին տրամադրվելիք ֆինանսական օգնության առնվազն 10 տոկոսը հատկացնել հայաբնակ Սամցխե-Ջավախք շրջանի զարգացմանը: