Չի հաջողվել պարզել կուրսանտն է մահից առաջ երկտող գրել, թե ոչ

Դատաձեռագրաբանական փորձաքննությամբ չի հաջողվել պարզել Վազգեն Սարգսյանի անվան ռազմական ինստիտուտի սպանված կուրսանտ Հայկազ Բարսեղյանի անունից գրված երկտողն ինքն է գրել, թե մեկ այլ անձ: Այս մասին Երեւանի Ավան եւ Նոր Նորք վարչական շրջանների ընդհանուր իրավասության դատարանում եզրակացությունը հրապարակելիս ասել է դատավոր Դավիթ Հարությունյանը:

«Ոչ մեկ մեղավոր չի ու կապ չունի, ուղղակի հոգնել եմ ու անհետաքրքիր ա, քաշքշուկի համար կներեք» բովանդակությամբ գրության վերաբերյալ, ըստ փորձագետի, կատեգորիկ եզրակացություն տալ հնարավոր չէ գրաֆիկական նյութի սակավության պատճառով:

Հիշեցնենք, որ newspress.am-ի հետ զրույցում սպանված կուրսանտ Հայկազ Բարսեղյանի հայրը նշել էր, որ գրությունը իր որդին չի գրել, նա նաև նշել էր որ ամբաստանյալների փաստաբաններից Արա Զաքարյանը առաջ է քաշում ինքնասապանության վարկածը ՝ գործը շեղելու համար:
Այսօր դատական նիստի ընթացքում դիակի դատաբժշկական փորձաքննության հրապարակումից հետո գործով ամբաստանյալ Նորիկ Սահակյանի պաշտպան Հովիկ Արսենյանն էլ ասաց, որ եզրակացությունն արժանահավատ չէ: Նա նշեց, որ դատաբժշկական փորձագետը հետևություններում նշել է, որ մահվան պատճառ է հանդիսացել սեղմման միջոցով վահանաճառի կոտրվածքը, մասնավորապես՝ արյունազեղումներ կան պարանոցի աջ հատվածին.

«Բնական հարց է առաջանում և առաջացել է ի սկզբանե, որի պատասխանն այդպես էլ չի տրվել: Այն ժամանակ, երբ քրեական գործ էր հարուցվել ու գրված էր, որ այս, այս մարդիկ նախնական համաձայնությամբ տարել-կախել են, և քննությունն այդպես է գնացել, հետո դատաբժշկական փորձաքննության եզրակացությունն է գալիս, որ լույս է սփռում, այնուամենայնիվ, ուղղություն է տալիս, բայց կարծես թե փորձել են հաշվի չառնել: Խնդիրը կայանում է հետևյալում՝ եթե սեղմման միջոցով է, ինչո՞ւ վնասվածքներ կան միայն աջ հատվածին, ինչո՞վ են սեղմել:

Իհարկե, դատաբժիշկն այդպես էլ պիտի գրեր՝ բութ առարկայի ներգործությամբ, նախաքննական մարմինն էլ պետք է ի վերջո վեր հաներ՝ քարո՞վ է, գործիքո՞վ է, ի՞նչ մեխանիզմով է եղել: Նախորդ դատական նիստի ժամանակ հրապարակվեց, այսպես կոչված, ականատես վկաների փորձարարությունը: Եթե մենք դա ընդունում ենք՝ որպես հալած յուղ, ապա ստացվում է, որ այնտեղ որևէ սեղմում տեղի չի ունեցել, որովհետև սեղմման դեպքում պարանոցի և աջ, և ձախ հատվածներում մաշկի և երակների արյունազեղումներ կառաջանային»:

Նա նշեց, որ «սեղմում» բառը դատաբժիշկն օդից է վերցրել: Փաստաբանն ասաց, որ տարիներ առաջ մասնակցել է ակադեմիայի կուրսանտի կողմից սպանության գործի քննությանը. «Այնտեղ ինձ համար ուղղակիորեն պարզ դարձավ, որ ակադեմիայում սովորեցնում են ինչ-որ ամերիկյան սպորտաձև, և դա կայանում է նրանում, որ մի հարվածով վահանաճառի կոտրվածքի դեպքում րոպեներ անց մահ է պատճառվում: Նույնը նաև այստեղ է տեղի ունեցել, և խոսել սեղմման մասին՝ ինձ համար շատ անհասկանալի է՝ դատաբժշկական փորձագետը որտեղից է վերցրել, որ սեղմում է տեղի ունեցել»,- հարցադրեց նա:

Դատավորն էլ որոշում կայացրեց դիակի դատաբժշկական փորձաքննություն իրականացրած փորձագետին հրավիրել դատարան:
Հիշեցնենք, որ Հայկազ Բարսեղյանի սպանության համար մեղադրվում էին նրա համակուրսեցիները` կուրսանտներ Գնել Թեւոսյանը, Նորիկ Սահակյանը, Վաչե Սահակյանը եւ Մովսես Ազարյանը։ Ըստ մեղադրանքի՝ նրանք հունվարի 29-ին՝ ժամը 02:00-ից 03:00-ի սահմանում, զորամասի ննջարանում դաժանությամբ սպանել են կուրսանտ Հայկազ Բարսեղյանին: