Այլևս ոչ մի բռնություն չի ներվելու․ Ավինյանը ավագանու երեք կին անդամներին զգուշացում տվեց

«Բռնությունն իր բոլոր դրսևորումներով մեզ համար մերժելի ու անընդունելի է և՛ ավագանու նիստերի դահլիճում, և՛ ավագանու նիստերի դահլիճից դուրս՝ լինի այն ֆիզիկական բռնություն, թե խոսքով»։ Այսպես սկսեց Երևանի ավագանու նիստը Երևանի քաղաքապետ Տիգրան Ավինյանը՝ անդրադառնալով նախորդ օրվա միջադեպին:

Նա հայտնեց, թե համապատասխան միջոցներ պետք է ձեռնարկվենի, որ նման դրսևորումներ ավագանու նիստերի դահլիճում տեղի չունենան:

Ավինյանի խոսքով՝ ավագանու կանոնակարգի համաձայն` ելույթները պետք է վերաբերեն քննարկվող հարցերին:

«Երեկվա իրադարձությունների նման միջադեպերը կանխելու համար անձամբ ես չեմ նայելու՝ մեր խմբակցության ավագանու անդամն է, թե ընդդիմադիր խմբակցության, բոլորին հավասար վերաբերմունք է լինելու: Հետևապես, իմ լիազորությունների շրջանակներում ուզում եմ երեք զգուշացում տալ` տիկին Սոնա Աղեկյանին, տիկին Նարինե Հայրապետյանին և տիկին Անի Խաչատրյանին»,- հայտարարեց Ավինյանը և խնդրեց գնահատել այն հետևանքները, որ խոսքը կարող է ունենալ, քանի որ, եթե խոսքը պարունակում է բռնություն, ապա կվերածվի ֆիզիկական բռնության։

Քաղաքապետը հորդորեց մտածել հետևանքների մասին:

Ավինյանը նաև հայտնեց, որ բոլոր վարչական շրջանների ղեկավարները, որոնք մասնակցել են հրմշտոցին, հետագայում նրանց որևէ նման քայլ չի ներվելու:

«Մեկը մի քիչ ավել, մեկը մի քիչ պակաս է մասնակցել, բայց հետագայում ոչ մի նման քայլ չի ներվելու»,- հայտարարեց Ավինյանը։