Նա ննջեց, որ չխենթանար, երբ տեսներ հանձնված Արցախը. այսօր Ռիտա Սարգսյանի մահվան տարելիցն է

3 տարի առաջ` 2020 թվականի այս օրը, կյանքից անժամանակ հեռացավ ՀՀ երրորդ նախագահի՝ Սերժ Սարգսյանի կինը՝  Ռիտա Սարգսյանը: Նա 58 տարեկան էր, երբ հրաժեշտ տվեց կյանքին:

Նրան ճանաչողներն ու բոլոր նրանք, ովքեր գոնե մեկ անգամ շփվել են Ռիտա Սարգսյանի հետ, տիկնոջը հիշում են միշտ բարի ժպիտով, բարեհամբույր կեցվածքով ու համբերատար մոտեցմամբ:

Ռիտա Սարգսյանը զբաղվել է բարեգործությամբ: Տասնյակ հազարավոր անհատներ և ընտանիքներ են երջանկացել նրա նվիրումով` լեյկեմիայի և աուտիզմի կենտրոններում բուժում ու խնամք ստացող մանուկներից մինչև Հայրենիքի պաշտպանի տանը վերականգնվող զինհաշմանդամներ և «Արագիլ» հիմնադրամի ջանքերով արհեստական բեղմնավորման շնորհիվ զավակի արժանացած ընտանիքներ:

Իր երեխաներին նա մեծացրել ու դաստիարակել է Արցախում: Սիրում էր իր հայրենիքը, հողն ու ջուրը: Ուստի դժվար չէր պատկերացնել, որ տիկին Ռիտան չէր կարող համակերպվել այս դավաճանության ու արժեհամակարգի ոչնչացման հետ:

Ասում են` Ռիտա Սարգսյանին կյանքից խլեց ահագնացած կորոնավիրուսային հիվանդությունը` հնարավոր է, բայց նաև փաստ է, որ նա չէր կարող ապրել հայրենիքը կորցնելու վշտի հետ: 

Նա հասցրեց ականատես լիներ այն ամենին, ինչ կատարվում է Արցախում և Հայաստանում: Նա առերեսվեց իր անձի և ընտանիքի նկատմամբ դրսևորված մեծ դավաճանություններին ու չարությանը: Նա այդ ամենը տարավ լուռ համբերությամբ, բայց չհաշտվեց Շուշիի ու Արցախի մյուս տարածքների  կորստի հետ...

Նա ննջեց, որ չխենթանար, երբ տեսներ, թե ինչպես է հանձնվում Արցախն ու ինչպես են հազարավոր ընտանիքներ մեծ շարասյունով բռնի տեղահանվում հարազատ երկրից:

Կենսագրություն

Ռիտա Սարգսյանը ծնվել է 1962 թվականի մարտի 6-ին, Ստեփանակերտ քաղաքում։ Ավարտել է Ստեփանակերտի Ալեքսանդր Գրիբոյեդովի անվան 3-րդ միջնակարգ դպրոցը՝ ստանալով երաժշտական կրթություն։

Որոշ ժամանակ աշխատել է մանկապարտեզում որպես երաժշտության ուսուցչուհի։ Ստեփանակերտից Երևան տեղափոխվելուց հետո չի աշխատել։

Ռիտա Սարգսյանը ուներ երկու դուստր և 5 թոռ։

NEWSPRESS.am-ը ցավակցում է Սարգսյանի ընտանիքին` Ռիտա սարգսյանի մահվան տարելիցի կապակցությամբ: