Ինչի՞ բունտ անենք, Շիրակը հինգ մարզպետ է փոխել. Շիրակի գյուղապետեր

Ակտիվորեն շրջանառվում է, որ Դաշնակցությանն են անցնելու նաև Արագածոտնի ու Շիրակի մարզպետների պաշտոնները: Դրան զուգընթաց տեղեկատվություն է տարածվել, թե Շիրակի մարզպետարանի ենթակայության տակ գտնվող մի շարք հաստատությունների ղեկավարներ պատրաստվում են նամակ-խնդրագիր ուղղել ՀՀ նախագահին ու վարչապետին, որպեսզի նրանք ձեռնպահ մնան Ֆելիքս Ցոլակյանին ազատելու մտադրությունից: Անձամբ մարզպետն էլ հայտնել է, թե այս մտադրությունից տեղյակ է, բայց փորձում է զերծ պահել այդպիսի քայլերից:

Newspress.am-ը զրուցեց մարզի մի շարք գյուղապետերի հետ: Օրինակ, Շիրակի մարզի Ամասիա համայնքի ղեկավար Աղասի Ամիրյանն ասաց, որ գյուղապետարանում իրարանցում չկա, ոչ մի նամակ-խնդրագրի մասին տեղեկատվություն էլ չունի. «բնականոն աշխատում ենք, հինգ մարզպետ է փոխվել, ի՞նչ է, նշանակում է, պետք է իրարանցում լինի»,- ասաց նա:

Մեզ հետ զրույցում Բայանդուր համայնքի ղեկավար Դավիթ Դավթյան էլ ասաց, թե նամակ -խնդրագրի մասին տեղեկություն չունի, բայց իր անձնական կարծիքով՝ Ֆելիքս Ցոլակյանին պիտի աշխատանքից չհանեն. «Մարդ է, էլ ինչ ասեմ, սրանով ասված է, միասին աշխատել ենք, բայց եթե աշխատանքից ազատեն` հաստատ բունտ չենք անի, բայց որ ձեռներս ճար լիներ, ձեռքներս ծալած չենք նստի»,-շեշտեց նա:

Լանջիկի գյուղապետ Արա Մարդոյանն էլ մեզ հետ զրույցում ասաց, որ բնականոն աշխատումն են, շարունակելու են նույն կերպ աշխատել անկախ զարգացումներից. «Մարզպետի փոփոխությունը պատճառ չէ, որ մեր գործը չանենք, ոնց որոշեն ընենց էլ կլինի, աղջիկ ջան, մեր ձեռն ինչ կա»,-եզրափակեց գյուղապետը:

Չնայած նրան, որ Ֆելիքս Ցոլակյանը փորձում է տպավորություն ստեղծել, թե շիրակցիները իր հնարավոր պաշտոնանկությունից դարդ կանեն, ակնահայտ է հակառակը: Ցոլակյանը դասվում է մարզի խնդիրներին իներտ վերաբերող մարզպետների շարքին, որը սահմանադրական փոփոխությունների հանրաքվեի ժամանակ ջանք ու եռանդ չխնայեց ՀՀԿ-ին ծառայելու համար: Բոլորը հիշում են նաև այն, թե Ֆելիքս Ցոլակյանը ինչ պահավածք ցուցաբերեց Ավետիսյանների սպանության օրերին: