Հյուսիս-հարավի Աշտարակ-Թալին ճանապարհահատվածում մեկնարկել է շինարարությունը

Հյուսիս-հարավ ճանապարհի Տրանշ-2-ի 34կմ հատվածում (Աշտարակ-Թալին) մեկնարկել են շինարարական աշխատանքները։

Այս մասին հայտնում են Ճանապարհային դեպարտամենտից:

Հիմնադրամի գործադիր տնօրեն Գոռ Ավետիսյանն այցելել է շինհրապարակ՝ ծանոթանալու կատարվող աշխատանքների ընթացքին։ Շինարարությունն ու տեխնիկական հսկողությունն իրականացնող կազմակերպությունները ներկայացրել են աշխատանքների ընթացքը։

Գոռ Ավետիսյանը նշել է‚ որ Աշտարակ-Թալին հատվածը Հյուսիս-հարավ ծրագրի կարևոր հատվածներից է‚ ու շատ կարևոր է‚ որպեսզի սահմանված ժամկետներում ու պատշաճ որակով 34 կմ երկարությամբ ճանապարհը հանձնվի շահագործման։ Նա ընդգծել է‚ որ շինարարության ընթացքում բոլոր հարցերը պետք է լուծվեն պատվիրատու-շինարար-տեխհսկող սերտ համագործակցությամբ‚ և իր կողմից հավաստիացրել է‚ որ «Ճանապարհային դեպարտամենտ» հիմնադրամի թիմը պատրաստ է ցանկացած հարցում աջակցել` աշխատանքների արդյունավետ իրականացման նպատակով։

Կապալառու կազմակերպությունը՝ «Լևանտինա Ինխեներիա ի Կոնստրուկսիոն» Ս․Լ և «Օբրաս Պուբլիկաս ի Ռեգադիոս» Ս․Ա» ՀՁ-ն‚ կատարում է հողային աշխատանքներ։

Այս օրերի ընթացքում արվել է մի քանի տասնյակ հազար խմ ծավալով հողային հանույթ։ Շինարարը տեղեկացրել է‚ որ մեծ թվով շինտեխնիկա է աշխատում շինհրապարակում‚ և առաջիկայում նախատեսվում է ավելացնել մեքենասարքավորումների ու աշխատողների թվաքանակը։

Շինարարության տեխնիկական հսկողությունն իրականացնում է «Էջիս Ինթերնեյշնլ» և «Կոքս Կոնսալթ» համատեղ ձեռնարկությունը։

Հյուսիս-հարավի Տրանշ-2-ի կառուցումն իրականացվում է ՀՀ կառավարության և Ասիական զարգացման բանկի ֆինանսավորմամբ։