ՀՀԿ-ի «գաղջն ու մջղավանջը»` ՀՅԴ-ի կատարմամբ

Փետրվարի 10-ին հանրապետությունը նորից լցվեց «գաղջով» ու Գալուստ Սահակյանի ասած «մջղավանջով»: Քաղաքական ինտրիգի մի ծայրը փակվեց, մյուսը` բացվեց: ՀՀԿ ԳՄ նիստից հետո ՀՀԿ Է. Շարմազանովն իսկապես «մջղավանջային» մի հայտարարություն արեց. «ՀՅԴ-ն ու ՀՀԿ-ն ունեն ընդհանուր համաձայնություն միասնաբար աշխատելու համար»:

Այնպես չէ, որ մինչ այս ՀՀԿ-ն ու ՀՅԴ-ն միասնաբար չեն աշխատել ու միասնաբար չեն կիսվել: Ուղղակի գաղջն է չափից շատ ավելացել: Իրար հետ պայմանավորվում են, իրար հետ քննարկում, իրար հետ դռնփակ որոշում կայացնում` առանց հասարակության կարծիքն հաշվի առնելու ու հետո ՀՀԿ-ական երտասարդ Է.Շ.-ը լայն ժպիտը դեմքին «ավետիս» է բերում:

Ինչևէ, քաղաքական հարցադրումը մնում է օդում կախված` Սերժ Սարգսյանի ինչին էր պետք չորս-հինգ պատգամավոր ունեցող ՀՅԴ-ն, առավել ևս, որ ՀՀԿ-ն հարկ եղած դեպքում ինչքան ուզում, այնքան խփում է:

Միայն այն, որ ՀՀԿ-ն ՀՅԴ-ին է տալիս Տարածքային կառավարման նախարարի պաշտոնը, դա արդեն խոսում է այն մասին, որ 2017 թ.-ի ընտրությունների պատասխանատվությունը կրելու է Դաշնակցությունը: Ու որքան էլ դաշնակ Արմեն Ռուստամյանն ասի, թե ՀՀԿ-ն հեղինակազրկված է, միևնույն է, ոչինչ չի փարատվի ու ՀՀԿ-ն էլ դաշնակների չեղած հեղինակությունից չի օգտվի: Պարզապես 120 տարվա ավանդական կուսակցությունը ոչ ավանդական գործելաոճով այսպես ասած «բռնաբարեց» վաղուց արդեն ճգնաժամում հայտնված քաղաքական դաշտը: