Իսրայելը դեմ է, որ Արևմուտքը խաղաղապահներ մտցնի Գազա

Միացյալ Նահանգները և եվրոպացի դաշնակիցները պլան են մշակում պատերազմի ավարտից հետո Գազայի հատվածում միջազգային խաղաղապահ ուժեր տեղակայելու համար: Դա միտված է մեծացնել ճնշումն Իսրայելի վրա՝ դադարեցնելու իր ռազմական գործողությունը Գազայի հատվածում քաղաքացիական բնակչության աճող զոհերի ֆոնին: Այս մասին գրում է Bloomberg-ը՝ հղում անելով իրազեկ աղբյուրներին։

Այդ գաղափարը քննարկող պաշտոնյաները խոստովանում են, որ «մեծ հարցեր են մնում այն ​​մասին, թե արդյոք նման գործողությունը հնարավոր կլինի Գազայում», հատկապես՝ հաշվի առնելով իսրայելական թերահավատությունը։

Այնուամենայնիվ, պաշտոնյաները կարծում են, որ ՄԱԿ-ի ուժեր ներգրավելու հնարավորության բարձրացումը կարող է դրդել Իսրայելին դադարեցնել իր ռազմական գործողությունները Գազայում, որոնք հանգեցրել են ավելի քան 11,000 մարդու մահվան և հումանիտար աղետի:

Անանուն իսրայելցի պաշտոնյաները Bloomberg-ին ասել են, որ թերահավատորեն են վերաբերվում ՄԱԿ-ի ուժերի արդյունավետությանը և ակնկալում են, որ իսրայելական զորքերը «ըստ ցանկության» կկարողանան ազատորեն մուտք գործել և դուրս գալ Գազա: